- Ruata
India ram lirthei company lian ber pawl, Maruti Suzuki chuan an lirthei lar leh hralh kal tak S-Presso chu model thar, kum 2022 model an tichhuak leh ta a. He lirthei hian Dual Jet, Dual VVT khawl a neih dawn bakah a hmaa chhuakin a neih loh himna hmanraw hrang hrang a nei dawn a. Rs. Nuai 4.25 – 5.99 man inkar a ni dawn a ni.
A khawl leh thildang
2022 S-Presso hian Next Gen K-Series 1.0L Dual Jet, Dual VVT petrol engine, Idle Start-Stop technology awm tel a hmang a. He khawl hian 65bhp power chu 5,500rpm ah a pechhuak thei ang a, 89Nm torque chu 3,500rpm-ah a pechhuak thei dawn bawk a ni. Transmission lamah chuan 5-speed manual leh AGS (Auto-Gear Shift) emaw AMT emaw a nei dawn bawk a. AGS bik hi a top variant Vxi leh Vxi+ variant-ah te a nei dawn a ni.
2022 Maruti S-Presso AGS hian ARAI in an enfiah danin petrol litre khat hmang km 25.30 a tlan thei dawn a, manual version ho chuan km 24.76 a tlan thei dawn bawk a, lirthei petrol heh lo tak a ni dawn a ni. S Presso len zawng hi a dung, a vang leh a san zawng indawt danin 3,565mm, 1,567mm leh 1,520mm a ni dawn a ni.
Chi hrang
2022 S-Presso hi trim 4 – Standard, Lxi, Vxi leh Vxi+ te a awm dawn a. Manual transmission hmang ho hi Rs Nuai 4.25 – Rs 5.49 man inkarah a awm ang a. AGS gearbox hi sawi tawh angin Vxi leh Vxi+ ah te a awm ang a, Rs Nuai 5.65 – Rs 5.99 man te a ni dawn a ni.
Lirthei kentel tur hrang hrang
2022 Maruti Suzuki S-Presso AGS variant bik hian ESP (Electronic Stability Program) with hill hold assist a nei dawn a, hemi awmzia chu chhoa tlan chhuah dawnin a hnunglama a tawlh loh nan reilote a lirthei hi amahin a in brake thei dawn a, hei hi tunlai lirthei chhuakah chuan a awm tlangpui tawh a, lirthei khalhtute tana awlsamna tur, thil tangkai tak a ni dawn a ni. Vxi leh VXi+ trims hian electrically adjustable ORVMs (Outside Rear View Mirrors) a nei dawn bawk a.
A man tlawm atang hian dual front airbags, ABS with EBD, pre-tensioners leh force limiter front seatbelts with front seatbelt reminder, high-speed alert system leh reverse parking sensor te a nei vek dawn bawk a ni.
S-Presso thar hian steering mounted audio & voice console, twin chamber headlamp, Smart Play studio leh thildangte a nei dawn a. Wagon R leh Celerio thar ber te ang bawkin Suzuki Heartect platform nghahchhana duan a ni bawk a ni.
Company lamin eng nge an sawi
S-Presso thar an tlangzarh chungchangah hian Shashank Srivastava, Senior Executive Director, Marketing & Sales, MarutiSuzuki India Limited chuan S-Presso chu lirthei dang huanga rinluh mai theih loh, huang hran ngat nei leh mite duh bawk si a nih thu a sawi a. A chhuah tanna a la rei loh ang aiin kum thum emaw chhung lekin 2,02,500 lai an hralh tih a sawi a, hei hian lirthei leitute rilru mil leh duhzawng taka ni tih a lantir niin a sawi bawk a ni.
Shashank Srivastava chuan tuna a khawl thar 1.0 K-series Dual Jet, Dual VVT engine with Idle Start-Strop technology a neih te, a tui a hehlohna te, kentel changkang tak a neih te hmang hian market lamah pawh a chet that leh ngei an beisei thu a sawi a ni.
Maruti Suzuki S-Presso hi lirthei huang anga sawi chuan lirthei te, hatchback ho zinga lian tha ve tak SUV anga a khalhtuin a ‘feel’ theih tur, sang at mai a ni a. He lirthei hi Mizoram chhungah pawh hralh kal tak a ni a. Tuna a thar, khawl thar tha zawk leh kentel tha zawk nei hi chu hralh a kal lehzual viau pawhin a beiseiawm a ni.