Aizawl: Aizawl South-II bialtu MLA Lalchhuanthanga’n, “Referral Hospital tihlamzuihtute bawk kha tunah an sorkar a, Zoram Medical College (ZMC) hi sawngnawi taka an chhuah a hlauhawm hle,” a ti.
Nimina ZPM party chhung inkhawmah he thu hi Lalchhuanthanga chuan a sawi a. ZMC chu recognise a la nih loh avangin nakum March-a MBBS first batch final exam turte chu lo pass chhuak ta sela, eng dinhmunah nge an din ang tih ngaihtuah tham a nih thu a sawi.
Lalchhuanthanga chuan Referral Hospital chu tuna sorkar mekte sorkar laiin an tihlamzuih tih sawiin, “A hnua Congress sorkarin a theih ang anga buaipui chhovin, an term tawp dawnah medical college chu an puitlin thei hram a, kum 2018 August thlaah class an tan,” a ti a. ZMC chu tun thlengin National Medical Commission-in a la recognise loh thu sawiin, “Recognise ni tura hmabak a la ko hle,” a ti.
Sorkarin ZMC-a thawktute a dah dan chungchang sawiin, Lalchhuanthanga chuan, “National Medical Commission-in zirtirtu chungchangah duh dan hrang hrang a nei a, tuna ZMC dinhmun nen hian a inang lo hle,” a ti a. ZMC-ah department 21 a awm thu sawiin, “Department 10-ah professor an nei a, department dang 11-ah an nei lo,” tiin zirtirtu thenkhat dah dan leh kaisan danah pawh sorkarin duhsak bik a nei ngei nia a lan thu a sawi.
Lalchhuanthanga chuan sorkarin khawl lei ringawt a tuipui nia sawiin, khawl man to tak tak hman mai theih lohte thlengin an kawl niin a sawi a. “Khawl leite chu pawh hi zirchian ngai thil a ni,” a ti bawk.