Vawiinah tualchhung football lal thar an awm dawn a, LBS Suzuki All Mizoram Inter Village Football Tournament 2022 champion an awm dawn.
Tlai dar 3-ah AR Lammualah final-ah champion inchuhin Sialhawk VC team leh Champhai Kanan VC team te an inkhel dawn a. Local football ‘class sang’, boruak pui tak hmuh tur a awm leh ngei dawn.
Team 204 telna tournament boruak a lian a, team an inthlifim tawh. Final a intum tur pahnihte fans an nei tha thin a, final en tura Aizawl pan an tam, an tam belh ngei ang.Final zinkawng
Sialhawk in final an panna kawngah round sang lam tih lo chu an hnehsawh hle a. A sang lamah team tha fiahna an paltlang bawk.
Tuaikual North LC team 5-1 a hnehin bul an tan a, an match dawt leh pathumah goal chhuah miah lovin Selesih, Samtlang VC leh Kawngpui Venglai VC team te an hneh a. Goal 22 an khung.
Round of 16-ah Mamit Jt. VC 3-0 a hnehin Farkawn VC chu 4-2 in quarter-final ah an hneh a. Team tha Ramhlun North chu semi-final ah penalty ah an hneh.
Lehlamah Champhai Kanan zinkawng a awlsam lova, fiahna hautak an paltlang fo.
Thenzawl East 10-2 a hnehin bul an tan a, team tha Melbuk VC team leh Serchhip Jt VC team te 2-1 leh 5-4 penalty in an hneh. Round of 32-ah Thakthing LC team 5-0 in an sawp.
Mahse round of 16 leh quarter-final Vaivakawn LC leh Republic Veng LC team lakah penalty hmang ve ve in an chak a. Semi-final ah Lengpui laka fiahna dang paltlang lehin an kawng a hautak a, an tlona an tilang.Team tha pahnih
Sialhawk in football nghet an khel a, a hmuhnawm ngawr ngawr aiin awmze nei in an inkhel thin.
Player malkhai a langsar sawi tur NorthEast United FC winger R. Laldanmawia an nei a, anni bakah Hyderabad FC rawlthar beiseiawm Crespo Vanlalhriatpuia an nei bawk, a bak erawh langsar an kawl lo. Mahse an team a inkhai rual tha a, an tlan taima in an fitness a tha. Counter-attack ah an hlauhawm a, inkhelah chak tumin ‘fight’ theihna lian tak an nei.
Lehlamah Champhai Kanan pawh team tlo an ni a, tun tournament a team hmuhnawm ber zing ami an ni. Mimal ah midfield khaipa ber Lalramsanga a pawimawh a, an inkhel ‘conductor’ ber a ni.
Tlarhmaah R. Ramdinthara chu a lu var vang chauh ni lovin a langsar a. A tlanchakna leh goal hlauhawm a ke atanga a chhuah ngun avangin an ralthuam tha a ni a. Tlarhnungah Chhawnkima a khawng thin.