Khaw lum uchuak takin Europe khawthlang lam a tuam hrem hnu leh a la ziaawm theih loh mek laiin hmar lam pawh a tuam belh tan mek.
France leh UK-ah chuan khaw lum uchuak tak a thlen dawn avanga inralrinna tihchhuah a ni a, hetih lai hian Thawhtanni khan Spain-ah chuan 43°C zet a tling phak.
France, Portugal, Spain leh Greece-ah ram nasa taka kangin chhungkaw sang tel hmun himah suan an ni.
UK-ah chuan a lum ber ni an tawn ngei rin a ni a, mi thiamte chuan France ram hmun thenkhatah pawh ‘khaw lum tawrh hlelhawm tak’ a thleng dawn niin an sawi lawk bawk.
Spain hmarthlanga Zamora region-ah chuan ram kang avangin mi pahnih an thi a, relkawng hnaih takah a kan bawk avangin rel kal tihtawp rih a ni a. Portugal hmar lamah pawh ram kang tlanchhiatsan tum pitar leh putar nupa an kang hlum bawk.
France ram hmun hrang hrangte chuan a lum ber ni an tawng hlawm a, khawthlang lama Nantes khawpuiah chuan 42°C a ni hial.
Tun hnaia ram kang avang hian mi 30,000 chuang tlanchhe tawhin emergency shelter siamah an awm hlawm a. Ramsa 1,000 chuang awmna sahuante pawh senghawi zingah a tel.
Chhimthlang lama khualzinte tlawh tam hmun, Gironde region chu a tuar na ber niin France ram hmun hrang hrang atanga kangthelhtuten hmun hniha ram kang thelh hna thawkin kar hmasa chhung khan ram hectare 19,300 chuang a kang chhe tawh a. Thawhlehni khan thli thawt zawng a inthlak avangin Bordeaux khawpui chu meikhu chhah takin a bawh phah bawk.
Gironde Regional President Jean-Luc Gleyze chuan, “Ka rilrua awm ber chu ramhuai chetna tih a ni,” a ti.
“Ramhuai octopus ang mai a ni a, a huam zau tawlh tawlh a, hma lamah, hnung lamah, lehlam lehlam atangin a lo thawk a. Khaw lum lutuk, thli leh boruaka hnawng a awm loh lutuk vang a ni a. Ramhuai a ni ringawt mai a, beih a harsa em em a ni,” a ti.
Thawtanniah khan khaw lum lam hi 40°C a kai a, Thawhlehnia a hniam deuh beisei ni mah se a danglam lo va, a ro em em a, thli thaw hawi zawng a danglam deuh ringawt thung.
Khaw lum hian hmar lam leh khawchhak lam a tuam tan zui a. Mi za telin an in chhuahsanin hmarthlang kila Brittany an pan a, kangmeiin thlai chinna bik hectare 1,400 a tichhe tawh bawk.
Thawhtanniah kha UK-ah chuan a lum ber ni zinga mi a ni a, England khawchhak lama Suffolk-ah chuan 38.1°C a tling a. Khawchin zirtute chuan Thawhlehniah chuan 40°C lai kai thei a nih thu leh England laili, hmar lam leh hmarchhak pawh a tuam tel dawn niin an sawi.
Khaw lum uchuak tak hian inkalpawhna pawh tibuaiin rel zin tur thulhtir a ni nual a, London-a Luton Airport-ah chuan an tlankawng a sat lutuk avangin thlawhna thenkhat zin tur an thulh hlawm bawk.
Netherlands-ah pawh Thawhtanni kha kumina a lum ber niin 33.6°C a kai a, Thawhlehni khan hmun thenkhatah chuan 39°C a hawlh phak rin a ni.
Khawchin zirtute chuan khaw lum uchuak tak hian hmar lam tuam zelin Belgium chhim lam kil, Germany khawthlang leh chhimthlangah chuan 40°C a nih theih hial an ring a. Germany-a DWD weather service chuan July, 2019 khan Duisburg-ah 41.2°C niin hei hi an rama a lum ber a ni a. An thupuangtu, Andreas Friedrich chuan Thawhlehniah khan River Rhine lui dungah chuan hetiang vela lum hi a ni thei dawn tih a sawi.
Spain leh Portugal-ah chuan khaw lum lutuk kaihhnawihah mi 1,000 chuang tun hnaiah an thi tawh a. Hmarthlang lama Losacio-a ram kangah Pathianni khan kangthelhtu pakhat a thi a, kum 69 mi beram vengtu hi Thawhtanni khan a ruang hmuh a ni.
Portugal-ah hian kar kal ta Ningani khan 47°C a kai a, July thlaa a lum ber ni a ni a. An ram hmun tam zawk chu national meteorological office IPMA chuan ram kang a chhuah mai theihna hmun nia sawiin inralrinna dar a khawng.
Portugal hmar lam, Murça vela khaw eng emaw zat chu ram kang zau zel avangin hmun himah lak chhuak an ni a, pitar leh putar kum 70 bawr vel, car-a tlanchhiat tumte chu kangmeiin manin an thi.
Kangthelhtute chuan hmun thumah beiin mayor chuan ram hectare 3,000 chuang a kang chhe tawh tih a sawi a. Thuneitute chuan kum 2017-a ram kang nasa tak, mi 66 zet an thihna ang kha an tawn leh an hlau hle.
Spain-ah chuan hmun 20 velah ram kang thunun loh a la awm a. Hmun him lam pana tlanchhia mi pakhatin rel atanga video a lakah chuan hmar lama Portugal nena an inrina bul hnai rel kawng sir tawn tawnah kangmei nasa takin an rel chu a hual tih a lang.
Tar lan tawh thin angin sik leh sa inthlak nasa avangin khawvel pumah khaw lum uchuak tak hi a na tawlh tawlh a, a daih rei tawlh tawlh a, sawi lawk a har tawlh tawlh bawk a. Khawvel pum hi industrial era hun lai aiin 1.1°C velin a lum tawh zawk a ni.