India hmarchhakah Tripura chu politics-a inhmelmakna leh inelna avanga inbeihna leh tharum thawhna thlenna tamna ber a ni.
National Crime Records Bureau (NCRB)-in Crime in India 2020 report a siam a tihchhuah tharah mi nuai khat zelah Tripura-ah hian thubuai 0.5% a awm niin an tar lang.
Tripura hnung hi Arunachal Pradesh chuan zawmin politics avanga buaina hi 0.1% a thleng a, Manipur-in a dawt leh bawk.
NCRB report atanga a lan dan chuan state pathum - Tripura, Arunachal Pradesh leh Manipur bakah hi chuan hmarchhak state dang pangaah politics avanga tharum thawhna leh buaina a awm lo.
Report-ah hian Tripura-ah nikum chhung khan politics avanga buainaa thubuai ziah luh 22 a awm a. Arunachal Pradesh leh Manipur-ah pakhat ve ve a awm.
Hetih lai hian state lian ber, Assam-ah chuan politics-a buaina hi awm lo mah se nikum chhung khan chi leh chi leh sakhua leh sakhua avanga buaina thubuai 17 ziah luh a ni thung.
State lian ber, Assam hi hmarchhakah chuan nikuma tualthahna thlen tamna ber a ni bawk a. Tualthah thubuai 1,131 a awm.
Assam dawtah hian Tripura awmin 114 an nei a. Meghalaya-ah 79, Manipur-ah 46, Arunachal Pradesh-ah 45, Mizoramah 28, Nagaland-ah 25 leh Sikkim-ah 11 a ni.