Champhai Kanan VC team in an tum ram an thleng a. LBS Suzuki All Mizoram Inter District Football Tournament 2022-ah champion trophy an chawi.
Thawhlehni a AR Lammual a final inkhelah Champhai Kanan hian an hma a ding Sialhawk VC team te chu minute 90 chhungin 2-0 in an hneh a. Final inkhel hmuhnawmah team tha zawk an nihna an khingpuite lakah an entir.Champhai Kanan in ramtiam an lut
Final inkhelah Champhai Kanan hian an team tha bera ngaih theih bul an tan tir a. Tlarhnungah captain C. Lalchhawnkima’n hovin midfield-ah fak hlawh Lalramsanga leh Jessie Lalmawizuala te an inkawp leh. A hma lamah tlanchak pahnih R. Ramdinthara leh Laltlanzova te an awm.
Sialhawk pawhin an line up tha ber a ngaih an luhtir a. Captain Laldanmawia chu an goal nawr lama a khaipa ber a ni leh dawn tih a hriat.
Inkhel tan atangin team tha Melbuk, Vaivakawn leh Republic Veng te lo hneh tawh Champhai Kanan in an football tha khelh leh an tum a, passing hmuhnawm khelh an tum. Mahse team thawkrim, tlan taima leh nghet Sialhawkin an tibuai leh thin a. First half-ah goal a lut lova. Ball kang a tam.
Sialhawk hi a hnung lama nghet a, an tlarhma te tlanchakna leh captain Danmawia finna hmang thiam an ni a, ball an vawrh leh thin. Mahse inkhel a reiah erawh Champhai lam an insiamrem avangin ball tha an hmu tam lo telh telh.
Minute 59-naah Champhai Kanan in goal an khung a, Jessie-a ball fing atang Tlanzova’n remchang a nei a, hmatawnga a tlanpui Tharpuia ten siamsakin ani hian buaina awm miah lovin tun tournament a a goal 12-na a khung.
Second half-ah Sialhawk tlarhnung tibuaitu chu Tlanzova bawk a ni a, a tlanchak leh ‘ball control’ tha avangin hlauhawm a hnen atangin a chhuak fo. Minute 88-naah hlauhawm taka penalty area chhunga ball a chanlaiin an ti tlu a, penalty hmu in Tharpuia’n goal-ah a khung a. Champhai Kanan hnehna a tichiang.
A tawp thlenga beidawng lova Sialhawk player tlan taima te beihna a fakawm a, mahse inkhel thununtu tur ‘playmaker’ an neih ve loh chu danglamna a ni.Chawimawina lam
Champion team in cheng nuai khat leh sing nga leh trophy an dawng a. Final a tlawm zawk Sialhawk hian cheng nuai khat leh runners up trophy an dawng thung a. Tualchhung football boruak tinungtu an nih avangin fak an phu.
Player chawimawinaah Champhai Kanan star pahnih Lalramsanga leh Tharpuia ten Best Player leh Top scorer chawimawina an la a. An pahnih aia phu an awm lovang.
Lengpui goalkeeper R. Lalhmangaihzuala chu Best goalkeeper a thlan a ni ve bawk.