Covid-19 kai an pung leh telh telh; fimkhur a tul
Ni za chuang hri leng laka kan dinhmun a hniam tawh laiin, tun hnaiah hri leng kai kan pung chho leh tial tial a, ramchhung hmun dangte ang bawk hian kan duh loh dana kan awm mai hi a hlauhawm leh tawh hle.
Fimkhurna kan tlachham ta deuh nia lang hi kan nuai bo a, mitin fimkhur tura kan inhrilh thar mawlh mawlh a tul leh tawh hle mai. Hri leng hian eng chen nge min umzui zel dawn a hriat loh a, chuvang chuan mitin kan fimkhur thar fo hi a ngai tak zet tawh a ni.
Mask vuah a la pawimawh reng tih kan hriat a tul a, kut silfai that mai bakah puipunna hmun reng reng tul tawpah loh chuan kan kal loh ngam a hun hle bawk. Mahni hi fimkhur ila, mahni inchhungah fimkhur bawk ila, midangte dinhmun tiderthawngtu i ni lo ngam bawk ang u.
Thawhtanni khan Mizoramah Covid-19 kai mi 280 hmuh chhuah thar an ni a, ni 112 hnua ni khat thil thua hri kai hmuh chhuah tam ber tum a ni. Kumin March 28 khan hri kai hmuh chhuah mi 248 awmin hemi hnu hian ni khata hri kai hmuh chhuah chu 200 hnuai lam zel a ni tawh a, Thawhtanni khan hri kai hmuh chhuah thar hian 200 pelin, 280 a tling leh ta a ni.
Kan dinhmun hi a him lo chho leh tan dek dek tawh niin a lang a, chuvang chuan i fimkhur thar sauh sauh ang u. Sorkar pawhin fimkhur a tulna thu hi huamzau zawkin nei reng bawk teh se.