Mizoram Pradesh Congress Committee (MPCC) chuan Mizoram sum leh pai dinhmunin hniam lam a pan zel avangin ralkhel dar vuak a ngai ta hiala an ngaih thu an sawi.
Lal Thanhawla Auditorium-ah nimin khan MPCC President Lalsawta hoin MPCC Executive meeting neih a ni. Resolution siamin Mizoram sorkara finance commissioner-in sum leh pai lama harsatna a zualkai tur thu a sawi, ni tin chanchinbua lo lang chu an ngaih thutak thu leh, ngun taka a zir chianin Mizoram sum leh pai dinhmun hian hniam lam a pan zel a, ralkhel dar vuak a ngai ta hialah an ngaih thu an tar lang.
Resolution-ah hian, “Sum leh pai lama harsatna namen lo kan tawh chhan hi eng dang vang ni loin, Pu Zoramthanga kaihhruai MNF sorkarin a tlaran zawnga ram an hruai vang a ni,” tiin, Lal Thanhawla kaihhruai Congress sorkarin inrenchem taka Mizoram sum leh pai dinhmun a lo siam that tawh sa, kum li pawh a ral hmaa MNF sorkar hian dinhmun chhe takah a dah leh ta mai hi a pawi an tih thu an tar lang bawk.
“MNF sorkar hian hmuh let lehna tur awm miah lo thilah sum tam tak tak a hman thin avangin Mizoram leiba pawh nasa takin a pung a. Hei hi siam that thuai a nih loh chuan Mizoram hi ‘Leiba thang’ (debt trap)-ah a tang ang a, mipuiten kan tuar nasa hle dawn a ni,” Congress party chuan an ti.
Congress party chuan Mizoram sum leh pai dinhmun hetiang a nih laia chief minister leh finance minister ni bawk, Zoramthanga’n ngawih a la chuh tlat hi a mawhphurhna a lak thutak lohzia tichiangtuah an ngaih thu sawiin, mipuiten sorkar sum leh pai dinhmun dik tak an hriat theih nan ‘White Paper’ tichhuak vat turin Mizoram sorkar an phut a ni.
MPCC Executive meeting-ah hian MPCC hruaitute term, July 24, 2022-a tawp chu kum 2023 General Election thleng pawh sei an rel bawk.