Aizawl: Mizo National Youth Front (MNYF) chuan ZPM MLA Lalchhuanthanga’n Zoram Medical College (ZMC)-a zirlaite tana ngaihthlak nuam lo zawng leh ZMC hmel timawk thei zawnga thu a sawi chu pawi an tih thu an sawi.
An thuchhuahah MNF Thalai chuan ZMC-in hma a sawn zel nana sorkarin theihtawp a chhuah zel tih sawiin, tunah hian ZMC-ah faculty leh resident-ah mi 146 awmin, heng zingah hian Professor 11, Associate Professor 21 leh Assistant Professor 38 an awm mek a. Hna zawm mai tur Professor pakhat awmin, Professor paruk leh leh Associate Professor paruk lakna tur advertisement chhuah a ni mek thu an sawi a. ZMC-a thawktu turte chu ZMC bye-law-in a sawi angin chief secretary chairman-na hnuaiah subject expert-te member niin MCI /NMC duh dan angin felfai takin lak thin a nih thu an tar lang.
MNF Thalai hian August 17, 2022 khan National Medical Commission (NMC)-in 4th Batch (full course) hawn a phalsak angin tunah heng 1st Batch-te hian kum 2023 final-ah exam an hmachhawn thei dawn niin an sawi a. Final Inspection nei tur hian Covid-19 leng avangin NMC lamte an thulh hnuah, inspection team-te hmachhawn thei tur hian ZMC a inbuatsaih reng tih an sawi.
ZMC hi Technical Institution dangte ang bawkin MZU-a in affiliate niin degree pawh an pek tur a ni a, ZMC-in boruak tha tak leh hmalam eng tak a neih laia ZMC-a zirlaite tana ngaihthlak nuam lo zawng leh ZMC hmel timawk thei zawnga thusawi a awm hi pawi an tih thu an sawi a ni.