AIZAWL: Springdale Academy, Zotlang, Champhaia principal leh vice principal chu zirlai hrem chungchangah an laka FIR thehlut an awm avangin police-in an man a, court-a an hruai hnuah district jail-a dah an ni a, nimin khan bail-in an chhuak.
Thudawnnain a sawi danin tun thla ni 5 khan zirlai pasarih chu sikula ken phall oh thil keng tawh lo tura hrilh an nih hnua an ken leh avangin hrem an ni a. Hemi nia hrem zinga zirlai pakhat nu leh pate chu lungawi lovin FIR an thehlut a, tun thla ni 19 khan police-in principal leh vice principal chu kovin court-ah hruai an ni a, district jail-ah dah luh nghal an nih hnuah nimin khan bail-a chhuahtir an ni.
Zirlai nu leh pa an lungawi lo tih an hriat hnuah school thuneitu pawhin an lo tih dik loh palh lai pawmin ngaihdam an dil a, zirlai nu leh pate chuan an ngaidam thei ta lo nia thudawn a ni.
Champhai atanga thudawnna pakhat chuan Springdale School zirtirtute chuan an zirlaite chu sikula ken phal loh keng tawh lo turin an hrilh tawh thin a. Tun thla ni 4 pawh khan zirlaite chu hrilh leh mah se, a tuk maiah a aia tam an ken leh avangin zirlai pasarih chu an hrem ta nia sawiin, an hrem zinga pakhat nu leh pate chu an lungawi ta lo va, mi dang nu leh pate erawhin sawisel an nei zui lo niin a sawi thung.
Springdale School zirtirtu an boruak tawn chu pawi an tih thu sawiin, an lo tih dik loh palh pawh an pawm rualin, zirlai an huat vang ni lovin, zirlaite thatna tur an duh vang zawka thil ti an nih thu leh inenfiahna tur an nei tih an pawm thu an sawi bawk.