Tlawng Hnar reserved forest area-a encroachment a awm em tih zirchiang tura Mizoram sorkarin High Court thu bawhzuia June ni 3, 2022 a a din Verification team-in Tlawng hnar tlawhin, an enfiah a. Lungleiah a kaihhnawih sorkar mipawimawhte leh Zobawk leh Lungpuizawl khawtlang hruaitute leh tlawmngai pawl aiawh te nen an inkawm bawk.
Verification team-ah hian Principal Secretary, EF&CC department chu Chairman niin, Additional Principal Chief Conservator of Forests (APCCF) chu Member secretary a ni a. Land Revenue & Settlement department, Sports & Youth Services department, Local Administration department leh PHE department aiawhte member-ah ruat an ni.
Tlawng hnar enfiahnaah hian Verification team te hi Member secretary APCCF, EF&CC department RS Sinha chuan hovin, Tlawng Hnar, Zobawk Reserved Forest huamchhung an enfiah a. Tlawng Hnar Reserved Forest Area enfiahnaah hian Verification team member-te telin khawtlang hruaitute leh tlawmngai pawl aiawh ten an tawiawm bawk.
APCCF RS Sinha chuan Gauhati High Court (Aizawl Bench) thupek anga verification team chu dina, hmalak a nih thu sawiin, an zirchianna report chu Mizoram Chief Secretary hnenah an thehluh thuai tur thu a sawi a. Ramngaw, nungcha, tuihna leh lui tui te humhalh chu EF&CC department thil tum pui ber an nih thu a sawi.
Zobawk leh Lungpuizawl khawtlang hruaitute leh tlawmngai pawl aiawh ten LAD District Park leh Sports Complex sak mek te chu khawtlang tana ruhrel tangkai leh pawimawh an nih thu leh Tlawng Hnar Reserved Forest Area pawn lama awm nia an hriat thu Verification team te chu an lo hrilh a. PHE Department hmalaknaa check dam siam tawh chu Zobawk leh a chhehvel khawtlangin tangkai taka hmang mekin water recharging dam siam tum pawh tui hna humhalhna kawnga hmalakna tha tak a nih thu Verification team te chu an lo hrilh bawk a ni.