AIZAWL: Leisenzo khaw ram, khaw chhung atanga km 6 vela hla, Ramlaiphul rama a chhan hriatloha Sanghal 3 thi e ruang chu nimin khan A.H & Vety department leh Forest department hotu ten an enfiah.
Report an dawn bawhzuiin Champhai atangin Veterinary officer Dr. Lalrinhlui leh Khawbung atangin Forest RO T. Laltlanhlua ten Sanghal thi te hi a hmunah kalin an enfiah a, Department-a thawktute, VC leh khawtlang mithenkhat ten an tawiawm bawk.
Sanghal thi te hi a pui 2 leh a note 1 niin, an thihna a rei deuh tawh avangin sample duhthusam anga tha lak tur awm lo mahse, sample theih ang angte endik tura lak a nih hnuah uluk taka phum nghal an nih thu sorkar thuchhuahin a tarlang.
Tun thla ni 1 khan Samthang ram Zopuiphul hnuai ngawa Nghalchang pakhat thi chu AH&Vety deptt. leh Forest deptt. hotu ten an enfiah tawh tih sorkar thuchhuah chuan a tarlang bawk.