Khawvela mixed martial arts inelna lian Ultimate Fighting Championship chuan khawvel MMA fans ten an hmuh chak tak ‘fight’ thleng turin hma a la a. September thla a UFC 279-ah welterweight fighter chunglam pan chak tak Khamzat Chimaev leh UFC star Nate Diaz te an inhmachhawn dawn.
FC Chief Business Officer Hunter Campbell chuan September 10 a inelna neih tur hi a sawichiang a. Las Vegas a pay per view an buatsaihah 170 pound fighter rorum pahnih inbitum hmuh tur a awm ang.
UFC 279 hi Las Vegas a T-Mobile Arena-ah neih a ni dawn a, fighter pahnihte hian contract la ziak lo mahse an inlan hun tur leh an khingpui turte an pawm ve ve tawh.Mi tlo leh mi hlauhawm
UFC veteran kum 37 mi Nate Diaz hian professional MMA-ah vawi 38 inelna hmachhawn tawhin vawi 20 a chak a. UFC title vawi khat chuh tawh a ni a, champion intlansiaknaah a tawp thleng pha ngai lo mahse fighter tlo leh tha ber zing ami a ni.
Kuminah UFC a contract a neihlai chu hman zawh ngei a duh a, vawi khat ‘fight’ a la neih chu hman ngei a duh thu a lo sawichhuak tawh thin a, UFC lam khingpui langsar tak dapsak turin a nawr nasa tawh hle.
UFC chuan contract ziahbelhpui duh mahse Diaz hian a contract hman zawh a duh ber thu tunhnaiah a sawi chiang bawk.
Fighter tan hlawh tak Diaz hi June 2021 a UFC welterweight title chuh tur Leon Edwards la a tlawm hnuah a la inlan leh lo.
A khingpui tur kum 28 mi Chimaev hi vawi 11 a la chak vek a ni a, UFC star thar zinga fak hlawh berah a tel a. Champion title chuh thuai tura ngaih a ni.
April thla khan welterweight title chuh tawh Gilbert Burns chu round thum chhungin a hneh a. MMA a fiahna a paltlang lian ber a la ni rih.
Chechnya a piang, tuna Sweden a cheng Chimaev hi UFC chanchin a fighter hmasawn chak berte zing ami niin middleweight ah pawh harsatna nei miah lovin a chak chho fova, UFC a zawm hnuin vawi nga inlanah a la chak vek.