Spanish football club Barcelona chuan Poland striker Robert Lewandowski chu Bayern Munich atangin kum li chhung atan Euro maktaduai 50 in an lalut.
Kum 33 mi hian German champion hnenah hian kum khat contract la nei mahse May thla khan chhuah a duh thu a lo sawi tawh.
Hemi hnu atang hian Bayern nen sawizawm ni rengin club pahnihte pawh rei tak an indawr a, tunkarah a insawnna tihfel niin Thawhlehni zing khan Barcelona in an striker thar hi an phochhuak.
United States a Barcelona in pre-season inbuatsaihna an neihah a team thar hi a zawm a, Miami-ah training a nei ve nghal.
“Barcelona ka zawm fel thei ta a, he club mi leh sa ka ni hi ka hlim hle.”
“Tunhnaia ni engemaw zah chhung kha chu thil a kal zung zung a, ni a rei duh a, rilru pawh a peng thui thei hle. Mahse tunah engkim tihfel a ni tawh a, tunah chuan ka nunah bung thar kai turin ka inpeih ta.” tiin Lewandowski chuan a sawi.
“La Liga a khelh hi ka duhdan a ni reng thin a, club lian tana khelh ka duh. Barcelona hi a chung bera an kir lehna, title tam thei ang ber an chawina tura theihtawp chhuah a pui turin anni hi ka zawm.” a ti bawk.
Lewandowski hian Barcelona a contract a ziahah hian Spanish football a an tih thin angin leichhuah theihna a nei a, hei hi Barcelona hian Euro maktaduai 500-ah an dah.
Kum 2014 khan Borussia Dortmund a hming a chher hnuah Bayern Munich hi free transfer in a zawm a. Season liamta khan match 46 atang goal 50 a khung a, a zawna vawi 10 nan Bayern Munich hi Bundesliga-ah a champion pui.
Bayern hnena kum 8 a khelh chhungin kumtin Bundesliga title a lak b akah UEFA Champions League chu kum 2019-20 khan a chawi tawh bawk.
German club tan hian match 374 khelin goal 344 a khung hman a, club chanchin a goal khung tam ber pahnihna niin Gerd Muller-a hnungah a awm.