UEFA Women’s Euro 2022 khelhmekah Netherlands star player zing ami forward Lieke Martens chu hliam avangin a inkhel ve tawh dawn lo.
Kum 2017 a European champion an nih tuma player of the tournament a thlan Martens hi Pathianni zana Switzerland nen an inkhelh tumin a inhliam a. An coach Mark Parsons chuan, “Tun tournament-ah ram tana theihtawp chhuah turin a inpe pumhlum a, hetianga a European Championship a tawp mai tur hi a pawi hle. Lieke tan chauh ni lo kan zavai atan thil pawi tak a ni.” tiin a sawi.
Kum 29 mi Martens hian tun season liamta kha hliam vangin a tawp a khar tha tawk lova. Inkhelh theih loh a nei nual. Nimahsela kumin inelnaah group stage a an match thumah erawh a khel vek.
Kum 2017 a The Best FIFA Women's Player leh UEFA Women's Player of the Year Award dawng tawhtu Martens hian Paris St-Germain tan a khel tawh ang.
Netherlands hi tun Euro 2022-ah hliamin a tibuai hle a. Captain Sari van Veenendaal chu dar hliam avanga a inhnuhdawh a ngaih bakah Arsenal forward Vivianne Miedema leh Manchester United midfielder Jackie Groenen te Covid 19 avangin an inkhel thei lo.
Groenen hi Swiss team an hmachhawn tumin inkhel leh tawh mahse Miedema hian quarter-final-ah France a hmachhawn thei ang em tih a chiang lo.