Bayern Munich chuan Netherlands defender Matthijs de Ligt chu Juventus atangin Euro maktaduai 77 in an lei a, kum nga contract a ziak.
De Ligt hian Ajax Amsterdam atangin kum 2019 July khan Juventus hi a zawm a, vawi 36 Serie A champion tawh hnenah hian kum nga contract ziakin an hnenah season thum a hmang hman.
Kum 22 hian Turin khawpuia hun a hman chhungin vawi 117 inkhel hmanin Serie A title vawi khat leh Coppa Italia vawi khat a chawi hman.
“Club ropui tak player ka ni tur hi ka lawm hle. FC Bayern hi Germany a club hlawhtling ber an ni a, Europe leh khawvel huap pawha hlawhtling ber zingah an tel.”
“Inbiakna kan neih tirh atangin club enkawltute lak atang leh coach bakah club board ten tih tak zetin min ngaihven a, min ngai pawimawh hle tih ka hre thei nghal a, hei hian thutlukna siam a ti awlsam hle. Chu mai chu ni lovin club inrelbawlna nghet leh fel tak nei, hlawhtlin tumna sang tak nei a ni bawk.” tiin club a zawm chhan a sawi.
“FC Bayern thawnthu ah telna ka nei ve tawh tur hi ka lawm tak zet a ni.” a ti.
Bayern chanchin a player manto ber chu kum 2019 a Atletico Madrid atanga defender Lucas Hernandez an lakluhna a ni a, ani hi Euro maktaduai 80 in an lalut.
De Ligt hian Italy-ah beisei anga hun a hman loh avangin tun nipuiah a hma hunin sawizui a hlawh hle a. Premier League club Chelsea pawhin an ngaihven ngawrh hle.
Nimahsela tun player bazar inhawn chhunga Dutch player Bayern pantu pahnihna ni turin midfielder Ryan Gravenberch-a hnung a zui ta zawk a. Bayern hian an squad tihchak nan Ajax atangin right-back Noussair Mazraoui leh Senegal star Sadio Mane te an lalut tawh.