Assam Forest Department chuan Barpeta district-a lova sava thahnem tak, tûra hrai ni ngeia ngaih thi chiam chu chhui turin thupek a chhuah.
Bohori Silagaon khuaah hian sava 300 chuang an thi a, an thih dan enin tûra hrai ngei nia hriat a ni.
Report thenkhata a lan dan chuan heng sava, chawngzawng leh parvate hi lova thlai chinte an tihchhiat loh nan tûrin nasa taka kah (phuh) nia a lan thu ziah a ni.
Chief Wildlife Warden M.K. Yadava chuan Assistant Conservator of Forest Ranjit K. Dutta chu he thil thleng hi Wildlife (Protection) Act, 1972 hnuaia section hrang hrang hmanga chhui chiang tur leh a thil hmuhte pawh chawlhkar khat chhunga thehlut turin a ti bawk.
Barpeta district-a sava thih chiam hi Thawhlehnia thleng kha a ni a. Hemi hma lawk, thla khat chuang vel liam taah khan Udalguri district-a municipal thuneitute chuan tui lam sava (egret) leh cormorant chick 250 chuang chu an bu chhehna atan mau an hman avanga a chhiat avangin a lo suat tawh.
Hetianga an tih chhan hi savain an bu an chhehna vela an hnuhmaah mihring an kala an tawh hian COVID-19 inkai chhawn a awm thei nia sawi vang a ni.
“Barpeta district-a thil thleng chungchangah hian thubuai ziah luh a ni a, forest ranger-ten umzuiin mi pakhat, Mannan Ali chu man a ni tawh a. Sava ruangte hi zir chiangin an thih chhan hi eng nge hriat tum a ni leh hmasa phawt ang,” tiin Assam Environment & Forest Minister Parimal Suklabaidya chuan a sawi.