Aizawl : LAD Minister K Lalrinliana chuan nimin khan Thenzawl-a Handloom Design Training Centre sakna hmun tur a tlawh.
Minister K Lalrinliana chuan, Thenzawl chu Mizo puan tahna hmunpui leh hralh chhuak tam khua an ni tih sawiin, chhungkaw tam takin Handloom chu eizawn nan an hmang a, an puan tahte mawi zawk leh tha zawka an siam chhuah theihna turin Handloom Design Training Centre sak tur hi a tangkai hle dawn a ni tih a sawi.
Handloom Design Training Centre hi Local Administration Department (LAD)-in RGSA hnuaia Economic Development and Income Enhancement Component a sak tur niin, a project cost hi Rs. 141 lakh a ni a. A building sakna tur hian Rs. 68 lakh ruahman a ni.
A building hi chhawng hnih tura ruahman a ni a, Sales unit leh Training unit te awm tura ruahman a ni a. Hei hi Thenzawl VC leh Handloom Association, Thenzawl te nena tangho a enkawl tur a ni. He project hian a building sak bak ah training, exposure tour leh marketing (a zawrh chhuah) lama hma lakna tur te a keng tel a ni.