Grammy chawimawina thahnem tak dawng tawh zaithiam Shania Twain hringnun lainatawm tak tarlanna, ‘Not Just a Girl’ chu Netflix-in trailer a tichhuak.
Canadian music idol a nih atanga rimawi khawvela sawinghingtu a nih chhoh hnu lam te, chawimawina leh ropuina hrang hrangin a umzui kara mimal tawrhna leh hliam na tak takte a chikim hle dawn a, a hringnun bung leh chang pawimawh tak tak hmuh theih a ni ang.
Netflix documentary tharah kum 56 mi Shania hian a thiantha ber nena a pasal hlui leh producer lar ni bawk Robert John Lange an lo inngaihzawn dan te, a thiannu Marie-Anne Thiebaud nena 2008 vel atanga a pasal hlui nen a ruka an lo inzui hnu-ah kum 14 chhung pumkhat an nih tawhna inneihna thianghlim leh hlu tak chu tihbawrban leh vuakchhiat a nih dan te pawh chipchiar taka en theih a ni bawk ang.
Trailer-ah hian 2011 kuma host Meredith Vieria-i’n, “I thiantha berin i pasal a ngaihzawn tak vanga inthenna lo thleng ta kha..” a tih te dahchhuah a ni a, a ruh langin phochhuah a ni.
Shania chuan, “Ka nu leh pa te ka hloh ang boruak rit leh hrehawm tak ang kha a ni a, ka ‘aw’ hi ka hloh kumkhua tawh dawn niin ka hria a, beiseina ka nei tawh lo,” a tih te pawh hriattur a awm.
Shania Twain hringnung tarlanna, ‘Not Just a Girl’ hi September 2, 2022 hian Netflix-ah en theih a ni ang.
A mizia leh nunphung
Milar mah ni se, milarte bula awm leh khawsak chu a khawr deuh tuk a, a lai nasa thei hle. Mi zakzum tak a nih avangin Shania Twain tan a hahthlak thin hle.
Kum 56-a upa hi rimawi khawvela album hralh hnem ber zingah langsar hle mah se, milar dangte bulah a ‘nervous’ nasa thin hle a, mi zakzum tak a nih bawk avangin a khawvel a zim thin hle, a ti.
Shania chuan, “Milar te han chu-e-kha e hi ka thiam lo. Nuam pawh ka ti lova, Sawi tur te hi ka hre lo thin a, ka zah-zum em avang hian kuang lo nawr anga inngaihna te a awm ka hlauh si avangin ka kimki chawih chhawih thin.
“Madonna nen an inhmuh hmasak ber tum phei chuan a lai nasa lutuk chu a khu ral lo chauh nia sawi zuiin, “Ka laih dan kha sawi ngaihna pawh a awm lo. A hring a hrana Madonna hmuh kha ka zam chhe nasa hle,” a ti.
Shania hi 2004 kum khan Lyme natna avangin mipui hmaa zai a chawlhsan a, tun ah erawh a tha tawh hle. “Kum 56 ka ni tawh a, ka kumzat anga chhutin hlim tak ka ni.