YouTube chuan Brazilian President Jair Bolsonaro-an video a dah (post) chuan dik lo takin coronavirus chungchang a thehdarh tiin a paih tih a puang.
Tech giant chuan hetianga an ti hi ngaihdan pakhat pawm bik vang emaw, politics thil vang a nih loh thu an sawi a, video-a thil awm vang zawk a nih thu an sawi.
Hripui a len tirh atang khan president hian inkharkhip, hmai tuam leh indanna lakte chu nasa takin a sawisel.
A pisa chuan YouTube thil tih dan hi engmah an la sawi lo va, video 15 lai niin tual chhung chanchinbute chuan an sawi.
A channel-ah hian kar tin ram mipui hnena thuchah a sawi te, thil hrang hranga minister-te nena an inkawmna te a tel a. Thenkhat phei chu live-a tihchhuahte a ni.
O Globo chanchinbu chuan video pakhatah phei chuan health minister hlui, Eduardo Pazuello-an coronavirus leh Aids a tehkhin dan vel pawh a awm.
Pazuello hian, “HIV a len hnuah hian HIV hi a la awm reng a. Thenkhat chuan an thihpui a, tam tak chu enkawl an ni a, nun chu a pangngaiin a la kal reng,” tiin a sawi.
CNN-in an tihchhuah video pakhatah chuan Brazilian doctor-in Covid-19 kaite enkawl nana sikserh damdawi, hydroxychloroquine leh anti-parasitic drug ivermectin a that thu a sawi a lang bawk a. Heng damdawite hi a tha tih finfiahna la awm lo a ni.
YouTube chuan Covid-19 damdawi chungchang leh hmai tuam loh sawi mawina lam chu an huanga dah an phal lo tih an sawi.