UK-a in neitu pawl (housing association) pakhat chuan an in luahtu zinga pakhat, a inah a thi chu an lo hriat loh avangin kum hnih chuang zet a luah man an chawitir tih hriat a ni.
He hmeichhia hi a thihna pawh kum hnih chuang ni ngei tawh tur a ni a. BBC-in a tar lan dan chuan kum 58 mi, Sheila Seleoane-i a ni.
Mi thiamten a ruhro tawh an endiknaah a ha atangin amah ngei a ni tih an hre chhuak a, Peckham-a a chenna ina living room thutthlengah a ruhro hi February khan an hmu a ni.
Housing society Peabody chuan thil thlengah hian ngaihdam an dil.
Seleoane-i hi an hmuh meuh chuan ruhro mai a lo ni tawh avangin a ruang endik (post-mortem) theih pawh a ni tawh lo va. London-a South Coroner court chuan an chhuina atangin Crohn’s disease an tih a vei niin a tar lang.
“Eng thihna pawh hi a lungchhiatthlak a, hetiang kum hnih chuang lo hriat lohte phei chu kum 2022-a thleng atan chuan a rapthlak hle,” tiin mitthite endiktu, Julian Morris chuan a sawi.
Seleoane-i ruang hi mihring chenna, Lord’s Court an tiha hetiang chen hriat lohva a awm theih hian mak tih a hlawh hle a. An hmuh hnuhnung ber chu August, 2019-a doctor a rawn kha a ni tawh.
A hrana chhuitute chuan housing society-in an in luahtu zinga mi a thi tih rei tak an hre lo chu thil mak tak a nih thu an sawi.
Peabody hian in luah man hi amahin a pek lova sorkarin a peksak thin atanga an lak mai avangin an hre lo va. June, 2020 khan gas an pek thin an titawp a, hemi tuma an enfiah pawhin tumahin an lo chhawn lo niin The Guardian chuan a tar lang.
Court-in a chhuinaah chuan a bul hnaia cheng dangten housing association leh police hnenah Seleoane-i chungchang hi an lo thlen ve tawh bawk a. Police hi vawi hnih a inah an kal a; mahse, hetih lai hian nungdama hmu awm anga sawi an awm thin avangin an en uluk lem lo tih hmuh a ni.