AZL: BJP Mizoram Pradesh chuan India president thlanna neih taka NDA candidate Droupadi Murmu thlan tlin lawmna nimin khan an pisa-ah an nei a. President atana Mizo ang bawka hnam hnuaihnung thlan tling a ni chu a chhinchhiah tlak hle tih BJP President Vanlalhmuaka’n a sawi.
Vanlalhmuaka chuan president atana tribal hmasa ber a nei ta chu lawmawm a tih thu a sawi a. “India ram ropui leh khawvela democracy ram lian berah president atan keini Mizote anga hnam hnuaihnung ve tho thlan tlin hi India ram chanchina thil chhinchhiah tlak a ni a. NDA sorkar hmalakna hi a ropui hle a, chi inthliarna tiboin BJP leh a kaihhruai sorkar hi a ropui hle a ni,” a ti.
Mizoramah pawh BJP hruai NDA candidate chu MNF party nen lungrual taka an vote avangin lawmawm a tih thu a sawi a. Party awmna avanga NDA member ni lo - Congress leh ZPM MLA te pawh Mizote tribal-pui a nih avanga vote-pui turin ngen mah se an duhthlanna an hmang thei lo chu pawi a tih thu a sawi.
BJP MLA Dr BD Chakma pawhin thu sawiin NDA atanga hotuten an beisei aia tam vote percentage an hmuh chhan chu tribal a nihna leh hmeichhia a nih vangin eptu lam atangin vote ta hi an awm nual nia a lan thu a sawi a. NDA hmalam hun hi a êng hle tih a sawi bawk.