Aizawl : Lunglei khawpui chhunga kohhran hrang hrang aiawh leh YMA Sub headquarters, Lunglei hruaitute’n nimin khan YMA Kumpuan ‘Ram leh Hnam Humhalh’ chungchangah inkawm hona an nei.
He hun Lunglei Venglaia YMA Office Conference Hall-a neih ah hian YMA Sub-Hqrs.Lunglei President Lalrotluanga chuan YMA-in kumpuan atana 'Ram leh Hnam Humhalh' a puan mek chu a hlawhtlin theih nan hian Kohhran te nen tan lak ho a tula an hriat thu a sawi a, chuvangin, Kohhran hruaitute nen inkawm hona an buatsaih ta tih a sawi.
He inkawmhonaah hian YMA hruaitute leh Kohhran aiawhte chuan ‘Ram leh Hnam Humhalh’ bawhzuia tanho theih dan kawng hrang hrang, inpawh takin an sawiho a. Ram leilung fate dikna leh chanvo humhalh kawnga tan lak a tulna te, Non-tribal sumdawnna leh Non-Tribal sponsor chungchang te, Ruihhlo do tur leh Ruihhlo avanga harsatna tawk te chhanchhuahna tura tanlak tlan dan tur te an sawi ho a ni.
Heng bakah hian Zirna tha a awm theih nana tan la tura hmalak dan tur te leh, Environment humhalhna tura hmalak ho te bakah, hlemhletna hrang hrang do tura ke pen tlan theih dan tur te an sawiho.
Politics tha lo avanga mipui moral a chhe nasa te chu vei awm an tih thu sawi ho a ni bawk a, Mizo nun zemawi, aia upa zah leh rinawmna te pawh chhawm nun a tul an tih thute, chhungkua atanga bul tan a tul tih an tarlang.
YMA zawnah leh Kohhran zawnah te, hmalak dan tur leh kalpui zel dan tur te, ruahmanna fel zawk leh changtlung zawk siamin, inrawn tlang chung zela hmalak chhoh zel ni se, an ti bawk.
Inkawmho hun hi YMA Sub-Hqrs. Lunglei, Vice President leh Kumpuan Committee Chairman ni bawk Lalfakzuala'n a kaihruai a. Kum puan Committee secretary C. Lalrindika'n report a pe a, kohhran hrang hrang aiawhte an kal tha hle a ni.