United States-a ram kang mek zinga a nasa ber, California-a kang mek chu chak taka Yosemite National Park bul vela a inman kai zel avangin emergency puan a ni ta.
Oak Fire tia an sawi hi Zirtawpni atang khan a inman kai chak zual sauh va, kangthelhtuten an la thunun mai hleithei lo.
“Thil a puak a, hei hi kangthelhtute tan hna tihautak zualtu a ni,” tiin California-a fire department chuan a sawi.
Ram kang hian chenna in 10 a tichhe tawh a, mi 6,000 chuang hmun him dangah sawn chhuah an ni tawh.
Emergency hi Mariposa County huam chhungah puan a ni a, state sorkarin ram kang thelh leh tul dangah sorkar laipui atangin tanpuina a dawng thei dawn tihna a ni.
Kang thelh tur hian a thelhtu 400 vel leh helicopter pali chhawp mek a ni a. CalFire thupuangtu, Natasha Fouts chuan thuneituten tun karah pawh kangmei hi thunun theih mai an la inring lo niin a sawi.
Tual chhung mite chuan ram kangin an in a hnaih zel avangin an tlanchhiatsan mek zel a. Putar pakhat, pheikhawk pawh bun hman lo chu kawra a car a tlan luh hnuah kangthelhtuten Zirtawpni khan an chhan chhuak.
Mi insaseng mek hian buaina a tithuahhnih hle a, an tan khawsakna tur leh tawm hulna tur ngaihtuahsak an ngai leh bawk a ni.
Khualbuk neitu pakhat, Alyssa Wildt chuan, “In tlan chhuahsante kan khualbuk chu an luahkhat vek,” tiin LA Times a hrilh.
“Vawiinah pawh kangthelhtuten pindan ruak an rawn zawng leh a ni,” tiin Wildt-i chuan a sawi a. “Kan nei tawh lo va, khaw tam zawkah chuan pindan awl a awm tawh lo,” a ti.
Sik leh sa inthlan nasa avangin khaw lum leh ro, ram kang a chhuah mai theihna hi a tam telh telh.
Khawvel pum hi sik leh sa inthlak nasa avangin industrial era hun lai aiin 1.1°C velin a lum tawh zawk.
Europe-a ram hrang hrangte pawhin khaw lum uchuak tak an tuar a, hmun tam takah ram kang nasa tak an tuarin an buai phah mek bawk a. Kang hi kar hmasa lamah khan a inman kai chak thut a ni.