Ukraine President Volodymyr Zelensky chuan an sipaiten rahbi khat tetea hma sawnin chhim lama Kherson region an lut thuk zel tih a sawi.
Kherson khawpui hi indona a chhuah tirha Russia-in an thunun nghal deuh mai kha a ni a, Dnipro lui thlang lama an inkhuarna hmun pawimawh tak a ni zui a ni.
Inrinni khan UK defence thuneitute chuan Kherson bulah hian inbeihna nasa tak a thleng tih an lo sawi tawh.
Ukrainian-te chuan an sipaiten hma an sawn hi luipui thlang lama Russian-te chak lakna a tiderthawng thei dawn niin an tar lang.
Tun thla tirah khan Ukraine Deputy Prime Minster Iryna Vereshchuk chuan Kherson-a chengte hnenah hian Ukraine chhim lamah an sipaiten beih letna lian tak an thlen dawn avangin an tan mai loh nan khawpui chu chhuahsan turin a lo hrilh lawk tawh a ni.
“Beihpui thlaknaah hian tul lo taka Armed Forces of Ukraine-in civil mite hlauhawma dintir a duh lo a ni,” tiin sorkar TV hnenah a sawi.
Kyiv sipaite hian Russia-te châk lakna a khaihlak theih nan lui kânnate chu an bitum hmasa a. Inrinni khan laipui hmangin Daryivskyi lei chu kah fuh a ni.
Kar hmasa Thawhlehni khan United States-in a pek laipui hmangin Kherson-a Russia-in an thunun lei pahnih zinga pakhat, Antonivskyi Bridge chu an lo kap tawh bawk.
Sorkar puih, TASS news agency hnenah Russian-te thlawpa Kherson-a rorelnaa deputy head chuan lei hi kah zel a nih chuan a chim mai dawn tih a sawi.
UK thuneitute chuan Antonivskyi Bridge hi Russian sipaite tana pawimawh tak a nih thu leh a hman theih loh chuan Kherson-a awm mekte tan engmah a lak luh theih dawn loh va, sipai leh politics thilah pawh Russia tana pawi tak tur a ni tih an sawi.
Kherson governor adviser Serhiy Khlan chuan, “Lei tin hian chak lohna lai an nei vek a, kan sipaiten thiam takin an tichhia,” tiin Facebook-ah a tar lang a. “Hei hi Kherson thendarhna a ni lo va; mahse, kawng dik zawhna tura rahbi pawimawh a ni,” a ti bawk.
Zelensky-a senior defence adviser chuan Russian sipai 1,000 vel chu Ukrainian sipaiten an hual vek niin a sawi bawk.
Oleksiy Arestovych-a hian Russian-te chu Kherson-a Vysokopillya khuaah hual an nih thu a sawi a, finfiahna erawh a awm rih lo.