Bihar-a Saran district-ah Pathianni khan halpuah leh halmawi sumdawnna neitu inah thil puakin mi paruk an thi.
Chhiatna hi Khudai Bagh khua, Khaira police station huam chhunga thleng a ni.
Sumdawng hi Shabir Hussain-a a ni a. Thil puak hian a puahna in eng emaw zat a tichhia a, a tihchhiat lohte hi a kang zui nghal a ni.
Police chuan in hi lui kama awm a ni a, a in tam zawk hi chu a chhia niin an sawi.
A chim karah hian mi pariat an tang a, lak chhuah theih vek niin hliam tuar chungin district hospital-ah lak an ni.
An khua hi district khawpui, Chhapra atanga km 30 chuang hreta hlaa awm a ni.
“Chhapra-a thil puaka in chim avangin mi paruk an thi a. A chim kara tangte chhanchhuah hna thawh nghal a ni a, thil puak leh a puah chhan hi chhui zui nghal mek a ni a. Forensic team leh Bomb disposal squad pawh koh an ni,” tiin Saran SP Santosh Kumar chuan a sawi.
Police chuan halpuahte hi in chhungah hian siam thin a ni a, a puah pawh hian puak dawt char charin darkar khat vel lai a puak niin an sawi a ni.
Sumdawng hian dan lovin halpuah leh halmawite hi inneihnaa mo lawmnaa hal turin a rukin, dan kalhin a hralh thin nia sawi a ni a. A in puak ta pawh hi dan lo bawkin, a halpuah hralh tur siam nan hian a sak niin news agency PTI chuan a tar lang a ni.
Sawi dan thenkhatah chuan a puak hian a in chauh a tichhe lo va, a bul hnaia in dang paruk pawh a tichhe tel a. In khi leh sawi chet dang pawh a nei nual bawk niin an sawi.