Sports Minister Robert Romawia Royte leh I&PR department minister Lalruatkima te chuan Tuikual North-a Indoor Stadium an tlawhin, tihchangtlun dan tur an enfiah.
Minister pahnihte hian Indoor Stadium chipchiar taka an fan hnuah khawtlang hruaitute nen an inkawm a. Sports Minister Robert Romawia Royte hian, khawtlang mipuite duhdan anga hma lak tha a tih thu leh Indoor stadium chu zirchiang turin mithiamte'n an zirchian hnuah a dinhmun hriatchian a, thawm that tur nge, vuak thiaha a thara sak that ngai tihte enfiah hnuah a rang thei ang bera hma lak tha a tih thu a sawi.
Bialtu MLA, I&PR Minister Lalruatkima chuan infiamna hmangin ruihhlo doin a nek chhuak mek a, infiammite'n taksa uluk taka vawngin zuk leh hmuam thlengin an insum tawh a, thalaite leh infiammite hmasawnna tur an ngaihtuah zel dawn tih a sawi a. Tuikual Indoor Stadium chu a sakna a rei tawhin a building pawh a hlui tawh avangin sak that a hun tawh tih sawiin, Sports Minister in a hmunah enpuia hmalak a tum chu lawmawm a tih thu a sawi bawk.
Tuikual Indoor Stadium hi kum 1992 a sak niin, Tuikual North Local Council huam chhunga awm a ni a. Chhawng ruk a sang niin Mizoram State Sports Council kutah a awm mek a, Indoor Stadium huam chhungah hian Basketball Court, Volleyball Court, Judo khelhna leh Mizoram Volleyball Association (MVA) office a awm a ni.