Tribal politician Droupadi Murmu-i chu Thawhtanni khan India ram president atan lak luh a ni ta.
Kum 64 mi, Odisha-a zirtir hna thawk thin hi rei vak lo chhung state governor pawh lo ni tawh a ni.
Murmu-i hi India-a tribal hruaitu zinga nihna sang chelh hmasa ber a ni.
“President dinhmun ka luah hi keima hlawhtlinna chauh a ni lo va, ram chhunga mi tin, hetiang dinhmun an thleng thei ang tih ringa suangtuahtute pawhin an thei,” tiin rinawmna thu tiama lak luh a nih hnuah a sawi.
India-ah hian president hi ram hotu lu ber a ni a; mahse, ama thuin thutlukna a siam thei lo.
Parliament-a rorelna in hniha member-te leh state leh union territory-a legislative assembly member-ten an thlang thin.
Murmu-i hian eptu tangrualte candidate, politician hlun tak, Yashwant Sinha a hneh a. Sinha hi tun hma, Atal Bihari Vajpayee-a prime minister a nih laia minister hlun tak leh BJP hruaitu lawk tak thin a ni a. Tunah erawh saffron party leh Prime Minister Narendra Modi-a sawisel nasa bertu zinga mi a ni tawh thung.
Murmu-i hian president kal chhuak ta, Pathiannia a hun tawp, Ram Nath Kovind-a a thlak a ni.
Murmu-i hi president thlan chuh tur hian BJP leh an thawhpui party-te chuan hming 20 vel an thlan chhuah zing atanga an vawrh chhuah a ni.
President thlanah a ding dawn tih hi television leh chanchinthar atanga lo hriain a barakhaih thu leh a lawm thu a sawi.
“Mayurbhanj district ang hmun kilkhawra tribal hmeichhia lehnghal tan chuan dinhmun sang ber chuh tura tih chu suangtuah phak a ni ngai lo,” tiin candidate a ni dawn tih a hriat hnua thuthar lakhawmtuten an kawmnaah a sawi.
Odisha-a politics hruaitute pawhin an lawmpui a, ‘kan ram leilung fanu’ tiin an sawi.
An state-a party-a a thawhpui thin, kum 1980 chho vel atanga inhmelhriat tawh, Kabi Vishnu Satpathy chuan Murmu-i hi ‘tum lam pan ngar ngar mi leh mi nun tlawm tak’ tiin a sawi.
“Mi khawngaih thei tak, thinlung tha, chapo lo leh langtlang a ni a. Mahni intar lang chi a ni lo va, mipuite nen zalen taka khawsa thin a ni a. Politician a nihna ang zawng pawhin mipuite hruai dan leh an kianga awm dan hria a ni,” a ti.
August thla hian India-a dan siamtute chuan vice-president tur an thlang leh dawn bawk.
BJP chuan an hruaitu hlun tak, West Bengal governor tang lai, Jagdeep Dhankar-a an vawrh chhuak dawn a. Eptuten Congress hruaitu hlun, union minister pawh lo ni tawh, Margaret Alva-i an vawrh chhuak ve thung ang.Murmu-i chu
Murmu-i hi kum 2017-a president thlan dawnah pawh khan BJP-in an candidate dawn tih sawi rik a lo awm tawh a, hetih lai hi Jharkhand governor a nih lai a ni.
Kum 1958-a Baidaposi khua, Mayurbhanj district-a piang, Murmu-i hi Santhal hnam, India-a tribal zingah pawh a tam ber zinga mi an ni.
Village council chief fanu a ni a, an state khawpui, Bhubaneswar-a Ramadevi Women’s College atanga inzir chhuak a ni.
Kum 1980 vel atanga amah hretu, chanchinbumi leh activist Nigamananda Patnaik-i chuan Murmu-i hi an khuaa sikul atanga lehkha zir bul tan a nih thu a sawi.
“Naupang a nih laiin a pa chuan an khaw thenawm, Rairangpur-ah hetih hun laia Odisha minister, Kartik Majhi-a’n a tlawh laiin a hruai ve a. Rang taka dawhsana tlan lawnin, a school certificate chu hmuhin minister hnenah hian Bhubaneswar-a lehkha zir duh thu a hrilh a ni,” a ti.
Hmeichhe naupangin a duhna a thlen chu minister pawhin a lo ngaihven hle a, a staff-te chu an state khawpuia sorkar sikula a luh theihna tur dapsak turin a ti ta niin Patnaik-i chuan a sawi.
Lehkha a zir chhuah hnuah Odisha sorkar hnuaiah clerk-in a awm a, kum 1979 leh 1983 inkar khan irrigation & energy department-ah junior assistant-in a thawk bawk.
Bhubaneswar-a a hna chu bansanin Rairangpur-ah a pasala nu enkawl turin a kir a, hetah hian Sri Aurobindo Integral School-ah zirtir hna a thawk pah nghal a ni.
“Hlawh pawh a la duh ngai lo va, sikul chuan a rickshaw chuan man chauh an pe thin a. Zirtir hna chu hna ni lovin vantlang tana a thawhna niin a sawi thin a. A pasal chu bank officer a ni a, a pasal hlawhin an chhungkua an inchawm thei tawk niin a sawi mai thin,” tiin Patnaik-i chuan a sawi.
Kum 1997 atang khan politics-ah inhmangin Rairangpur-ah hian tual chhung roreltu, councillor atan thlan a ni a. Hetih lai pawh hian an khuaa faina hna an thawhte chu a hmunah a enpui a, ni sa hnuaiah hna thawkten kawr leh bawlhhlawh an tifaite chu a thutpui ve reng thin.
BJP hmingin state assembly-ah kum 2000 leh 2009 khan Rairangpur bialah hian thlan tlin a ni.
Kum 2000 leh 2004 inkar khan Naveen Patnaik-a kaihhruai, Biju Janata Dal kaihhruaia tangrual sorkarah minister niin commerce leh transport a chang thin a, fisheries & animal resources a chang zui leh bawk.
Kum 2006 leh 2009 inkar khan an state-ah BJP-a scheduled tribe wing-ah president a ni.
Murmu-i hi kum 2009 khan vanduaina nasa takin tlakbuakin a fapa upa zawk a chân a. A hnu kum reilo te chhungin a fapa pahnihna leh a pasal a sun leh bawk.
“A hrehawm a ti tak zet,” tiin Satpathy-a chuan a sawi a. “Kan inhmuh apiangin a tap a, ‘ka nunah hian neih engmah ka nei tawh lo’ a ti thin,” a ti.
Mahse, inthing harh lehin kum 2015 khan an state thenawm, Jharkhand-in hmeichhe governor an neih hmasak ber atan ruat a ni a. Kum ruk chhung, July, 2021 thleng a ni.
Jharkhand-a a awm lai hian a pisa chu vantlang tan a hawn zau em avangin mi fak leh chawimawi a hlawh thei hle a, tute mah inthlahrung lovin an chuangkai thin.
Tih dan phung lo tak taka chet chang pawh a nei a. Heng zingah hian Odisha Chief Minister Naveen Patnaik pawh a chenna ina a tlawh te, railway minister-in mi a tirhte hmuin a awmna district, Mayurbhanj thleng rel a tlan theihna tur kawng dap turin a lo dawr hmiah te pawh a tel.
“Heng thilte hi tih dan phung bawhchhiatna a ni ngei a; mahse, engah mah a ngai lo,” tiin politics-a amah kaihruaitu (mentor), Rajkishore Das chuan a sawi.
Das-a hian Murmi-i fak leh a chhinchhiahna lian ber chu engtik lai pawha rilru fim pua helhhawlh a nei lo chu a nih thu a sawi. “A hlim em em lai te, a lungngaih lai leh a lungchhiat lai ngei pawhin a fim em em reng thei a, a nubut ngai lo,” a ti.
“Amah leh an chhungkuaah vawi tam lungchhiatna tur a thlen pawhin mipui tan a thawk reng a, hei hi a chakna duhawm ber niin ka hria,” a ti.