Barcelona president Joan Laporta chuan an star player ni thin Lionel Messi chungchang a sawi a. An club-ah Messi-a thawnthu a la zo lova, Camp Nou-ah a tawp kharna mawi tak pek chu a mawhphurhna nia a ngaih thu a sawi.
Messi hian nikum nipui khan kum 21 hun a hman tawhna hi a chhuahsan a. Spanish club hian contract thar an pek theih loh avangin Paris St-Germain a pan.
Laporta chuan, “Messi hi kan hnena a awmlai khan kan engkim a ni.”
“Barca tan chuan kan player ropui ber a chhal theih a ni a, engkim kha a hnehsawh em em vek. Ka ngaihdanah chuanBarca tan hian Messi nena tehkhin theih awmchhun chu Johan Cruyff chauh a ni.”
“Mahse inthen hun a awm a ngai a, kan dinhmun tha lo tak kan rochun avangin thutlukna siam harsa tak kan siam a ngai. He club-ah hian tumah mimal lian lutuk an awm lova, club hnuaiah player-te, coach-te an awm.”
“Kan hnena Messi-a thawnthu hi a la tawp lovin ka ngai a, ropui taka kan inthlah hi kan buaipui a ngai in ka hria. Mawi taka inthlah theihna hi a la awm turah kan ngai.” tiin a sawi a. An star player hi Spain a hruai kirleh nan kawng a hawng.
Argentina forward hian PSG-ah kum khat contract a la nei a, kum khat dang ziah belh theihna a la nei bawk. Laporta hian Messi hi Barcelona a lak letleh a duhthu a lo sawi fo tawh thin.