Formula 1 world champion ni lai, tun season world championship a hmahruaitu ni mek Max Verstappen chu French Grand Prix-ah pakhatna a ni a. A elpui, Ferrari car khalhtu Charles Leclerc a chetsual avangin a tan hnehna chang turin harsatna a awm lova, world champion nih inchuhnaah a hmahruaina a pawtsei.
Circuit Paul Ricard a intlansiakah hian Ferrari car khalhtu Leclerc-a’n intlansiak tan atangin hma a hruai a. Verstappen-a’n ngawrh takin um mahse a pha lo.
Mahse lap 18-naah Monagasque driver in tihsual a nei. Kual 11-na, kawng kual thui tak Double Droite du Beausset-ah a car ke hnung veilam a inpaih. Car thunun zo lovin a vir chhuak a, bang a tauh hnuah a tlan lut leh thei tawh lo.
Hmahruaitu a awm tawh loh hnuah Verstappen-a’n remchang a la a. Tun season intlansiak 12 awm tawh atanga a vawi sarih nan pakhatna a hauh. Intlansiak hmabak 10 la awmah point 63 in hma a hruai tawh a, world champion a nih lehna tur kawngah dal theitu an awm a beiseiawm lo tawlh tawlh.
Formula 1 a intlansiak vawi 300 a hmachhawnnaah Lewis Hamilton chu pahnihna a ni a. Tun season a car nei tha tawk lo Mercedes in ni duhawm hmangin an driver dang George Russell chu pathumna a ni bawk. Russell leh Red Bull car khalhtu Sergio Perez te intlansiak tawp dawn lama an inum a hmuhnawm a, intai zauh an nei.
Tlar hnung ber atanga bul tantu Ferrari driver Carlos Sainz chuan pangana a hauh a. Second 5 penalty pek a ni chungin tlan tha hle in Driver of the Day a thlan a ni.
Verstappen chuan, “Vawiinah kan tlanchak a, chutihrualin Charles a vanduai. Hliam engmah a neih loh ka beisei. A chetsual hnuah kha chuan ka tan a harsa tawh lova, tyre dim thiam kha a ni deuh tawh mai.” a ti a.
“Hmasawnna tur erawh kan la nei a, a bikin lap khat tlan chak zawngah Ferrari kan la tluk lo. Chuvangin rim taka kan thawh chhunzawm zel a ngai.” a tiFerrari an fuh hleithei lo
Kum 24 mi Leclerc-a’n tihsual lian a neih hma in Verstappen nen an intlansiak a hmuhnawm dawn tih a lang.
Red Bull Racing in kawng ngila an tlanchakna chu hman tangkai an tum a, ‘high downforce setup’ an car-ah hmangin Ferrari in tun season a an car thatna tak - kawng kuala an tlanchakna chhawr an tum ve thung.
Italian team hian kawng kuala an car a nghehna turin ‘low downforce setup’ an hmang. A ngilah Red Bull in top speed sang zawk an nei chungin a kualah Ferrari an pha lova. Verstappen-a’n intlansiak tan tirah Leclerc a lehpelh theih lohna chhan a ni.
Red Bull in 340 kph te a ngil a an hawlh thuak thuak laiin Ferrari in 330 kph bak an tlin thin lo, mahse a kualah an phak loh miau avangin Red Bull in thluak an hmang. Verstappen chu car ke thlak tura ko lut hmasa zawkin a hma a awm Leclerc chu ‘undercut’ an tum.
Le Castellet khaw boruak a lum a, tlankawng a sat avangin tyre dim a ngai. Hei hi Red Bull in remchanga lak theih an inbeisei. Mahse a tawpah erawh an kutah hnehna hlan a ni a. Tun season-ah a vawi thumna atan Leclerc a tlan zo thei lo.
“Tun season-ah kan che tha thin hle, mahse khatianga tihsual ka neih leh thin chuan chet thatin awmzia a nei dawn lo.” tiin Leclerc chuan a tihsualah mawhphurhna a la nghal.
Italian team hian an driver pakhat zawk Carlos Sainz an tlan tir danah pawh sawisel an hlawh hle. A car ke an thlakin pitlane-ah Alexander Albon-a hma lawkah hlauhawm taka an tlanchhuah tir avangin second 5 hremna pek an ni.
Ferrari hian hremna an nei dawn tih hre reng chungin Sainz hi an tlan rei tir a. Medium compound tyre an hman tir chuan a daih tluan dawn lo tih hre sa renga an che tlai chu an tuar. Tun kartawpa a pumpui a car tlan chak thei bera ngaih khalhtu Sainz-a’n hremna a tawrh hnuah midang um a a dinhmun siam leh turin hun a nei tawh lo.