Nigerian forward Victor Osimhen chuan Premier League club te nen sawizawm a nih fo hnuah a hmalam hun a sawi chiang a. Italy chhuahsan a tum rih lo.
Kum 23 mi hian season liamta khan match 32 atangin goal 18 a khung a. Napoli tana a chetthat avangin club lianin an ngaihven hle.
Tottenham Hotspur chu amah ngaihventu zinga sawirik rin an ni a, Manchester United pawh sawi tel an ni bawk.
Osimhen chuan a hmalam hun chu Napoli-ah a awm rih a, tun nipuiah chhuah tumna a nei lo tih a sawi.
“Hun harsa ka tawk fo thin a, mimal nunah pawh, mahse Napoli hi ka tana awm reng thin an ni a, hei vang hian an hnena cham ka thlang. Khaw nuam tak a ni a, club nuam tak a ni bawk.” tiin chhuah a tum loh thu a sawi.
“President nen pawh kan sawi dun tawh a, ani hi thutlukna siamtu a ni. Kan club in ruahmanna a neihte min hrilhfiah a, team tha tak din an tum a, hengte han hriat hi a lungawithlak hle. Napoli-ah ka hma hun hi a awm a, a bak chu kan la thlir zel ang.” a ti.