Khawvel ram hrang hrangah hri chi khat, monkeypox a darh mek a, hemi avanga World Health Organization (WHO)-in global health emergency a puan tawh hial laiin Mizoramah erawh he hri vei emaw, a vei nia rinhlelh pawh an la awm lo.
The Zozam Times zawhna chhangin IDSP State Nodal Officer Dr Pachuau Lalmalsawma chuan tun dinhmunah chuan monkeypox vei nia rinhlelh pawh Mizoramah a la awm lo tih sawiin, he hri lakah hian Mizoram chu a la fihlim rih nia an ngaih thu a sawi.
Sorkar laipuiin monkey pox laka invenna tura inkaihhruaina a siamte chu district hrang hrangah health department hotute thawnin, rinhlelh deuh awmte chu enfiah nghal zel tur leh beng chhi tura hriattir an nih thu IDSP state nodal officer chuan The Zozam Times a hrilh.
Monkey pox hian khawsik thlenin, pangti bawl leh nghawng vel bawl lian leh thaktein a lan chhuah bakah natna dangte pawh a thlen thei.
Hetiang anga natna nei rinhlelh kai an awm chuan health department hotute hnenah hriattir vat turin mipui an ngen tih a sawi a, he natna hi inkaichhawn theih thil a nih avangin Covid-19 anga darh vak thei a ni a, fimkhur tlan a tul thu a sawi.
He hri leng mek hi thlawhna hmanga khualzin, Lengpui Airport-a tum zingah vei an awm palh pawha dah hranna turin lengpui PHC chu sorkarin a ruahman tawh.
Ram hrang hranga darh chak tak, monkeypox hi WHO chuan global health emergency-ah a puang tawh a, ram hrang hrang sorkarte chu doctor leh damdawi in lamah he hri laka inven dan zirtirna uar zawka kalpui turin a hriattir bawk.
India ramah he hri vei mi pali hmuh chhuah tawh niin, an zinga mi pathum chu Kerela mi, India ram pawna zin chhuahna nei an ni a, an zinga mi pakhat, Delhi mi chu ram pawna zin chhuahna nei lo a ni.