AZL: Tun hnaia ruah sur nasa avanga Republic Venghluna lei tlahniamin chhungkaw thahnem tak chu an in luah ngam loin a siam.
Republic Veng khawtlang hruaitute hnen atanga thudawn danin Republic Venghluna Lungli tuikhur leh a chhehvelah kar liam ta atang khan lei a che tan a, Lalnunmawia Hnamte chenna in, chhungkaw panga luah chu Pathianni khan lei che hian a ban tichein a tiderthawng a, luah zui ngam a nih loh avangin a chengte bungrua chu local council ruahmannain khawtlang huapa thiar chhuah a ni.
Pathianni zan khan Lalnunmawia te in bul step chu min lehin heng avang hian Lungli tuikhur chhehvela cheng chhungkaw 15 chuang an inthiar chhuak a, chhungkaw 16-ten an bungraw la chhuak chuang loin an riak chhuak thung.
Lei che avanga in chhuahsante hi a then chu Republic YMA Hall-ah chentir an ni a, chhungkaw thenkhatin an chhungte an bel thung a. Nimin khan disaster management lamin lei chetna hmun hi an tlawh a, Lalnunmawia in hi thiah tura tih a ni.