MNF party adviser, Minister of State ni bawk Lalruatkima’n “MNF sorkarin inthlan dawna kan inzawrhna -election manifesto- kan tihlawhtling deuh vek tawh,” a ti.
Diakkawn YMA Hall, Kolasib-a Kolasib block MNF buatsiah leadership- cum- political training-ah he thu hi nimin khan Lalruatkima chuan a sawi a. MNF chu hun harsa lo thleng tur hre lawk vektu Pathianin rintlaka a ngaih, Pathian hriakthih niin a sawi.
Lalruatkima chuan "MNF sorkar hnuah kan kawng a lo ṭha ta hle a, gas kan hnianghnar em em a, Mualkhang Bottling plant zauhna tur pawh ram lei fel a ni leh tawh" a ti a. "Oil Depo pawh kan neih thuai theihna tura hmalak mek a ni a, lirthei chhiah rit tak ni ṭhin chu mipui tana phurrit lo zawnga siam rem a ni a, ni za inhlawhnaah pawh ni za ṭhak ṭhak kan inh- lawh thei a ni," a ti.
"Congress sorkar laiin Zu zawrh avangin kan mangang em em a, thlanmualah kan liam zawih zawih a, tunah chuan zu zawrh avanga kan manganna pawh tih tawp a ni ta," Lalruatkima chuan a ti a. "Sorkar hmasa hunlaiin Zophaiah Assam police-in kan zirlaite silaiin an kap a, Zoram kan ṭap a ni. Khatih lai khan kan zirlaite chhantu leh chhan ngam sorkar kan nei lo" tiin, MNF-in sorkarna a chan hnu ah thil a inthlak nasa ta hle nia sawiin, "ram neitu sorkarah chuan Police te an huaisen ta a ni" a ti.
Lalruatkima chuan "Tunhma lamin Union bugget-ah Mizoram hming a la chuang ngai lova, chaw min fun kep ngai lo" tiin, "Pu Zorama sorkarah erawh chuan vaibelchhe 600 lai mai min fun kep ta te hi a ropui takzet a ni," a ti bawk.
MNF party adviser chuan "Kan elpui zingah chuan Congress an ruhrel a lian ber a, chutih laiin mipui ten an la ngaidam lo" a ti a. "ZPM te hi tu pawl ber nge an nih zawh fe ngai khawpin an party-ah pawl hrang hrang an tam a, an committee te hi an titau a, an inchhuahsan zung zung mai a ni" a ti a. ZPM boruak chu a chhe hle nia sawiin, "sorkar chi an ni lo," a ti bawk a ni.