India Meteorological Department (IMD) chuan Thawhtanni atanga Zirtawpni lo awm tur thleng hian India hmarchhak hmun hrang hrang ruah a sur ang a, tek a tla bawk dawn niin an sawi a. Hmun thenkhatah phei chuan a sur tam dawn niin an sawi lawk.
“Bay of Bengal chhim lam atanga boruak inmung mekin ruah leh tek hi hmarchhakah a thlen dawn a, hmun thenkhatah chuan tam deuh pawh a sur thei a. A vang lai hi Thawhlehni leh Nilaini a ni ang,” tiin IMD hian Ningania thuchhuah an siamah an tar lang.
Ninga chhung khaw awm dan tur an tihchhuahah IMD chuan, “Ningani atanga Inrinni thleng hian hmun thenkhatah chuan ruah hi tam vak lovin a tla tan ang a. Pathianni leh Thawhtanni atang hian hmarchhak state tinah a darh zau hret hret ang,” an ti.
IMD hian nimin leh vawiinah hian Assam, Arunachal Pradesh leh Meghalaya-ah chuan ruah a sur dawn niin an sawi lawk bawk.
Meteorological department chuan Thawhtanni atang Arunachal Pradesh, Assam, Meghalaya, Nagaland, Manipur, Mizoram leh Tripura hmun hrang hrangah ruah a sur ang a, tek pawh a tla dawn niin an sawi.
Pathianniah hian tek bakah thli, darkar khata km 30-40 vela chak pawh Nagaland, Manipur, Mizoram leh Tripura-ah thawk thei niin an sawi a. A tukah Assam leh Meghalaya pawh telin a thawk leh thei niin an sawi.