Premier League club Southampton chuan tun nipuia an player thar parukna an lalut a. Bordeaux atangin rawlthar striker beiseiawm Sekou Mara an lalut fel.
Kum 19 mi hian St. Mary’s Stadium-ah kum li contract a ziak a. Season liamta a Ligue 1 mawngphah a awm Bordeaux tan league-ah match 26 khelin goal 6 a khung a. Season harsa tak kara an tana beiseina siamtu pakhat a ni.
Saints boss Ralph Hasenhuttl chuan, “Sekou hi goal khung turin kan lalut. French league-ah goal a khung thei a ni tih a lantir tawh a, tunah chuan rim taka thawh a, Premier League-ah a chhunzawm thei a ni tih a lantir a ngai.”
“Player naupang a ni a, ramdangah a cheng dawn a, league tharah a khel dawn. Hun pek a ngai, mahse a lakah beisei sang tak kan nei a, club hma huna mi pawimawh tak a ni thei.” tiin a sawi.
France Under-21 international Mara hian kum 2021 February atangin Bordeaux tan hian a khel tan a, inelna hrang hrangah match 35 khel tawhin goal 7 a khung bakah midang khung tur vawi 6 a siamsak.