Brooklyn Nets star Kevin Durant chuan chhuah a dil atangin kar li a liam tawh a. NBA team zingah duhtu tam mahse tih tak zet a ngaihven ngam an tam lova, heng zinga mi Boston Celtics chuan Nets hi inbiakna an neihpui mek.
Durant hi NBA a team 30 awm zingah champion lai Golden State Warriors tih loh chuan an duh vek anga ngaih theih a ni a, nimahsela kum li contract neilai a nih avangin eng team pawhin lalut dawn se Nets lama a lakluh nan a an pek tur a tam dawn hle a. An team duansa thiah a team duan that an mamawh deuh vek hlawm dawn a, hei hi an ip chhan a ni.
Celtics pawh hian Durant hi ngaihvenin inbiakna Brooklyn nen hian nei ngei mahse team dangte aia KD lalut thei tura dinhmun thatna bik an nei lem lova. Amaherawhchu All-Star forward Jaylen Brown chu Nets hnena an kaltir zingah a tel theih dawn avangin midang aiin an beiseiawm zawk deuh niin an ngai.
Miami Heat, Phoenix Suns leh Toronto Raptors te chu Durant ngaihventute zinga thawm nei ring deuh an ni a. Mahse tun dinhmunah Celtics hian Nets hi inbiakna an neihpui thui ber.
Nets lam hian an dinna an sawhsawn lo bawk a. Durant hi an trade dawn chuan a letleh lam an beisei lian hle a. nprotected first-round pick leh pick swap engemaw zat bakah an squad a danglamna siam thei tur khawpa player langsar engemaw zat an beisei tel.
Hetihlai hian Celtics hian an team-ah All-NBA forward Jayson Tatum tih loh chu khawih chet rem tih loh player an nei lo mek.