Aizawl: ZPM Leader Lalduhoma chuan ram sum leh pai enkawl chungchangah MNF sorkar a hlawhchham tih sawiin, Chief Minister Zoramthanga chuan sum enkawl tur hian mipui rinngam a hlawh tawh lo tih a sawi.
Khawzawl leh a chhehvel fang kual mek ZPM leader hian nimin khan Khawzawl Vengthar leh Chawngtlai Venglaiah vantlang inkhawmah thu sawiin, tuna ram sum leh pai dinhmun thlirin, sum enkawl chungchangah sorkar hrawn mek hi a hlawhchham chiang hle tih a sawi.
“Kan ram sum leh pai enkawl tur hian tuna kan chief minister hi mipui hian kan ringngam tawh lo,” a ti.
Lalduhoma hian MNF hi pawl ropui tak, ram leh hnam tana thisen pawh hlan ngam ni mah se, an hotu lu ber avang hian tunah chuan an tluchhe mek tih a sawi a. MNF-ah hian ram leh hnam hmangaihtu mi thahnem tam tak an awmin, an hruaitu berin a zir miau loh avangin an pawlin a tuar a, mi beidawng tam tak an awm tawh tih a sawi.
ZPM leader hian Mizote hi hnam taima leh thuawih tak, sorkarin thlai ching tura a tih ang ching zel mah se, a market lam ngaihsak leh si loh avanga kut hnathawktute an beidawng leh thin thu a sawi a. Mizoram hi taima apiang an beidawnna ram tih sawiin, “Kan ram tluchhe mek siam tur hian keini hi kan lo pen chhuak ta a ni,” a ti.