Tuirial-a Solid Waste Management Centre (SWMC) chu nimin khan ZPM MLA-ten an tlawh a; Aizawl khawpui bawlhhlawh sawngbawlna hmun chu enkawltu nei lo ang maia a awm thu leh ruahmanna mumal a awm loh avangin a nih dan tur ang taka hman a ni lo chu tha an tih loh thu an sawi.
ZPM Leader Lalduhoma chuan thu sawiin, “Gate luh chiah hian a hmun tura ruahman ni miah loah bawlhhlawh a vum thur a. A tawntirh maia bawlhhlawhte hi kawra nawr liam a ni a. Kawr hian Tuirial lui a fin a. Kan lui dunga bawlhhlawh paih lo tura min zirtirtu ber, a sorkar ber hian lui dungah kan bawlhhlawhte a nawr liam hmiah hmiah a, a dik lo hle a. Hei hi a pawi em em a ni,” a ti.
Tunah hian district headquarter pangaah SWMC hi Rs. nuai 60 theuh pein hma an laktir a, building pakhat mah a la din loh thu leh pakhatmah a la function lote hi chak taka hma lak a nih loh chuan ram lei lung a tihchhiat mek avangin pawi a tih thu a sawi.
Lalduhoma chuan miin in an sa a, in an thiat a, ipa khung mai theih loh lirthei liana phurh tham mi pakhat pawhin paih tur a neihte chu sorkarin a paihna tur hmun a buatsaih miau loh avangin a ruka zana kawngpui sira paih an tam tih a sawi a. “A paihtute kan dem a, hrem pawh a tha. Chutih rual chuan, heng mite hian paihna tur an nei miau lo a, sorkarin a paihna tur hmun vawiin thlenga a buatsaih loh avangin hetiang hi a thleng a, kan sorkar hian a tih tur hi a ti tawk lo hle a ni,” a ti.
Thingtlang khaw tam takah an khaw luh dawn emaw, an khaw pelh deuhah emaw bawlhhlawh paihna an nei thluah tawh tih sawiin, heng an bawlhhlawh paih khawmte hi a thlang kawrah tawlh thlain, kawr têin kawr lian zawk a fin hnuah lui lian zawkah a luang lut ta zel a. Khaw tin thli hi rannungte tana chet hleih theih lohin siam mek avangin awmze nei zawka bawlhhlawh hi hmun khata paih khawm theihna turin sorkarin hma a lak thuai a tul niin Lalduhoma hian a sawi.
Thusawitu dang, ZLP Secretary Dr Vanlalthlana pawhin SWMC hi an veina a rei tawh thu leh assembly session-ah pawh an lo sawi fo tawh thin tih a sawi a. UD&PA hnuaia bawlhhlawh sawngbawlna enkawltu, SIPMIU-in AMC kutah a dah tawh tih a sawi bawk.
Dr Vanlalthlana hian mipuite chu bawlhhlawh thliar hrantir an nih laia SWMC-ah erawh bawlhhlawh thliar hran mumal a nih loh thu a sawi a. “Tawih thei lo paihna hmunah a paih theih tawh loh avangin gate bulahte paih a ni a. A tawih thei paihna tur hmun pawh a thlen hleih theih tawh loh avangin a sirah bawlhhlawh chhekkhawmin, hengte hi a remchan hunah excavator (JCB) hmangin kawrah nawr thlak leh a ni a. Hei bakah, landfill panna tur kawng dalin chhak lamah bawlhhlawh paihte chu lui kawrah nawr liamin, chu chuan Tuirial lui a fin leh a. Tun lai angah lui enkawl te, hriselna lamahte kan harh thar mek laiin, a buaipuitu ber kan ngaih UD&PA leh AMC angte pawhin hma an lak a tul hle a ni,” a ti a; mipuiten bawlhhlawh sawngbawl dan an hriata sorkar hi kawng tha zawk zawh tura koh harh an duh avanga SWMC hmun hi tlawh an nih thu a sawi a ni.
SWMC tlawhnaah hian Lalduhoma leh Dr Vanlalthlana te bakah ZPM MLA dang - C. Lalsawivunga, VL Zaithanzama leh Lalchhuanthanga te pawh an tel a ni.