Aizawl: MPCC President Lalsawta chuan, “Mizoramin sorkar tha a mamawh a, Congress party hian kan pe thei a ni,” a ti.
He thu hi nimina Aizawl District Congress Committee (ADCC)-in Congress Bhavan-ah Political Training an buatsaih a hmanpuinaah Lalsawta hian a sawi a. Sorkar tha nei tur chuan eiruk awm lohna, sumin thuneihna a chan lohna ram, hausakna vang chauha house rorelnaa luah chuan ram a chhe thui dawn hle a, eiru lo, ramin roreltu tlak Congress party-in an ngah tih a sawi.
Lalsawta hian, ram hruaitu zingah natna hlauhawm leh dam thei tawh lo natna chi khat, ‘Thluaka sum lut’ a nei anih chuan ramin chhiat lam a pan zel dawn a. Chutiang mi chu ram rorel tura thlan loh ngam a hun tawh niin a sawi bawk.
“Zoramin sorkar thar a mamawh em em a. Sumin thuneihna a chan lohna sorkar thar chu Congress party-in kan pe thei che u a ni,” MPCC President in a ti.
ADCC Vice President PC Lalhuapzauva kaihhruai inkhawmah hian ADCC President Vanlalzuiliana pawhin thu a sawi a. MPCC president bakah John Siamkunga, Gen. Secy. MPCC i/c GAD-in a hmanpui bawk.