Kum kua zet a chin hriat lohva a bo hnuah tleirawl pakhat chu kum 2013-a tihchhuah mi bo zawnna digital copy pakhat avangin a chhungte nen an inhmu leh thei ta.
January 22, 2013 khan Mumbai-a Adheri venga cheng, kum sarih mi chauh, Pooja-i chu a nutapa nen sikul an kaina kawngah Henry Joseph D’Souza chuan ice-cream leisak tura thlemin a ru zui ta a ni.
D’Souza hi tunah chuan man a ni tawh a, police hnena a sawi dan chuan a nupui nen fa an neih loh avangin Pooja-i hi fa atan a ru niin a insawi.
Tumahin an hriat loh nan Karnataka-a hostel-ah an dah nghal a, a hming pawh Annie D’Souza tiin an thlak a. An nupa kara fa an neih hnuah la chhuakin awmpui cheiin an chei zui ta a ni.
Tuna kum 16 mi ni tawh, Pooja-i hian a chhungte a hre tawh lo va; mahse, D’Souza ruiin an fanu a ni lo tia a sawi atang leh an enkawl dan atangin ngaihthat lohna neiin a chhungte a zawng ta a ni.
A thiante nen internet-ah ‘Pooja missing’ tia an zawnna atangin kum 2013-a amah an zawnna an hmu chhuak a. Number panga intar zinga pali chu biakpawh theih a nih tawh loh laiin pakhat chu Pooja-i te thenawma awm, Rafique chhungkua an lo ni hlauh a ni.
An inbiak hnua thil chinchang an sawi hnuah Rafique-a chuan video call-a biain Pooja-i niin a hria a, a nu nen an inbe zui ta a, a nu pawhin a lo hre chiang hle a ni.
Police hrilhin an fanu kum 16 mi lai lo ni tawh leh a chhungte chu lawm takin an inhmu khawm leh ta a. A bo chhung hian Pooja-i hian pa a lo nei lo hman a, a bo nia a sikul kaipui a nutapa leh a u chauh an lo ni tawh a ni.
Police officer Milind Kurder chuan D’Souza hi mi ruk bo leh dan lova mi chhawr thubuaiah an man tih a sawi a. A nupui pawh thubuaiah hian a hming ziah lan niin man erawh a la ni rih lo tih a sawi.