- Ruata
Rei tak ata thawm lo nei reng tawh Royal Enfield Hunter 350 chu tlangzarh fel a ni ta a. He bike hi chi thum Retro, Metro leh Metro Rebel te a awm ang a. A indawt dan hian a man tur hi Rs Nuai 1.49, Rs Nuai 1.63 leh Rs Nuai 1.68 (ex-showroom man vek) a ni dawn a ni a. He bike model hi tun dinhmunah Royal Enfield lirthei zinga a man tlawm ber a tih theih awm e.
A khawl
Royal Enfield Hunter 350 hian an lirthei danga kan hmuh ang bawk, 349cc, single-cylinder, 4-stroke air-oil cooled engine fuel injection technology hmang chu a nei leh dawn a. Hei hi Meteor 350 and Classic 350 tharah te pawh kan hmuh ang hi a ni. He 5-speed gearbox nei khawl hian 20.2bhp power chu 6100rpm-ah a pechhuak thei a, 27Nm torque chu 4,000rpm-ah a pechhuak thei bawk a ni. Company lam chuan Hunter 350 top speed hi 114kmph a nih thu an tarlang bawk a ni.
A len zawng leh thildang
Hunter 350 hi a pianah chuan retro sports bike lam hawi niin Royal Enfield dang aiin a te bawk a. A wheelbase hi 1370mm a thui niin hei hi Meteor leh Classic te ai pawhin a tawi zawk a ni. Meteor aiin kg 10 in a zang zawk a, Classic 350 aiin kg 14 in a zang zawk bawk a. A fuel tank-ah hian petrol litre 13 a leng a, a seat san zawng hi 800mm a ni bawk a ni. He bike thar hian wheel rim 17inch a nei a, a hmalamah 110/70-17 leh a hnunglamah 140/70-17 tyre te a hmang bawk a. A man tlawm ber retro hian a wheel rim-ah wire spoke kan tih ang hi a rawn hmang a, a mawi dangdai viau mai a, a dang pahnih hian alloy wheel an hmang thung a ni.
Suspension leh Braking System
RE Hunter 350 hian a hmalamah 300mm disc, twin-pot caliper leh a hnunglamah 240mm disc with single-piston a nei a. He bike variant zawng zawngte hian dual-channel ABS (anti-lock braking system) an nei vek a ni. Suspension setup lamah chuan a hmalamah hian 41mm telescopic fork (130mm travel) leh a hnunglamah 6-step preload adjustable twin emulsion shock absorbers (102mm travel) te a nei bawk a ni.
A rawng
Royal Enfield Hunter hi rawng chi 6 – Rebel Red, Rebel Blue, Rebel Black, Dapper Grey, Dapper Ash leh Dapper White te a awm a ni.
A kentel leh design
Royal Enfield Hunter 350 hian retro-styled design language neiin he bike-ah hian a headlamp, circular turn indicator, IRVM leh taillight te a bial vek a ni a. A landanah hian cruiser ai mahin roadster lam a pawl zawk a ni. He bike thar mawi tak mai hian teardrop shaped fuel tank a nei a, a foot peg hi an dah hnung hret a, hei hian sports lam rawng ti kaiin Classic 350 te nen chuan a ‘riding position’ hi a inang lo a ni. A fuel tank-ah hian Royal Enfield badge mawi tak mai a awm a. A instrument console te hi Meteor-a kan hmuh ang deuh hian vuah a ni a, tripper navigation pod pawh awmin hei hi duhthlan theihin a awm a ni.
He bike thar mawi tak mai hi nimin (Thawtanni) khan Aizawla Royal Enfield dealer, Lawma Enfield pawhin an phochhuak a. Bike thar tha tak mai, tleirawl leh thalai la naupang zawk te rilru mil lehzual a lo chhuak hi thil lawmawm tak a ni a. Kum upa lam pawhin an lei tho dawn nangin a bik takin tunlai thalai lawm chi a ni lehzualin a lang a. He bike thar hian Honda CB350RS, TVS Ronin TD leh Jawa Forty Two te ho a rawn el dawn niin a lang a, market lamah pawh Royal Enfield lirthei hralh tikaltu bike model pawimawh tak a ni dawn a tih theih awm e.
Royal Enfield Hunter 350 man (ex-showroom)
Variant Ex-showroom
Retro Rs 1,49,900
Metro Rs 1,63,900
Rebel Rs 1,68,900