Lemchan mai ni lo, rimawi khawvelah pawh hming chher pha, 1970s leh 1980s chhoa hla lar tak, ‘I Honeslty Love You’, leh ‘Physical’ hmanga mite duhrawn a ni a, movie musical hit tak, ‘Grease’ hmanga lemchan khawvel sawinghing dawttu ni bawk, Olivia Newton-John chu kum 73 mi niin a chenna California thlang lamah a thi.
British-a piang, Australia-a seilian thih thu a instagram-ah tarlan niin, ‘a chhungte leh thianthate uaplumna hnuaiah thlamuang takin a kal ta,’ tiin ziah a ni.
Grammy vawi li dawng tawh Newton-John hian kum tam liam ta tawh khan hnute cancer vanga enkawl a nih thu a lo sawi tawh a, hrisel lohna neuh neuhin tlak buak zuiin, concert programe thahnem tak pawh cancel a ni nghe nghe.
‘Grease’ film-a a chanpui John Travolta chuan, “Nun hlimawm leh tha zawk min hruai thlengtu a ni,’ tiin a thlah liam. “Mi hneh theihna duhawm tak i nei a, ka hmangaih che.. engtikah emaw chuan kawtthler mawiah kan la intawk ang a, kan khawsa ho leh dial dial ang,” a ti bawk.
Country singer lar tak ni bawk hian khawvelpum huapin album copy maktaduai tam tak a hralhchhuak thei a, chutih rualin high sikul zirlai Sandy anga a inlanna, ‘Grease’ kha khawvel milar be pawlah a vawrhchho chiang hle.
US television host Oprah Winfrey chuan, “A mihring mihrina a thatna hi inkaichhawn awlsam tak a ni a, Oliva, kan ngai dawn hle mai che,” tiin a uithu a ziak.
Zaithiam Rod Steward phei chuan a ui lehzual a, “Hmeichhe duhthusam, hmeltha leh duhawm, mahni inrintawkna ngah tak kan chân ta,” tiin thlahna thu hnuhnung a hnutchhiah.
Chawrchhuah leh larchhuah
Newton-John hi September 26, 1948 khan Cambridge, UK-ah a lo piang a, a pa hi indopui pahnihnaa British spay niin, a nu hi German nobel laureate, Max Born fanu a ni a, 1933 kuma Nazi hoin thuneihna an chan khan Germany an tlanchhiatsan a ni.
An chhungkuain 1954 khan Australia-ah an pem a, hetah hian a seilian. Kum 1971 khan Bob Dylan-a phuah, ‘If Not For You’ a sak chu tihchhuah niin, rimawi khawvelin a hmelhriat tan. UK charts-ah pasarihna niin, a lar chho nghal hle.
Kum 1974 leh 1977 inkar khan US number one hits pasarih ngawt a nei thei a, Grammy Award pali a dawng bawk.