Nitish Kumar chuan BJP kaihhruai tangrual, National Democratic Alliance (NDA) chhuahsanin Bihar chief minister a nihna atanga a banna a thehlut a, hetih rual hian Rashtriya Janata Dal (RJD) kaihhruai tangrualah tel zui nghalin MLA 160 thlawpna a neih thu a thlen a, ro a rel chhunzawm leh hmel.
“Ka bâng, NDA chhuahsan tura thutlukna hi party thutlukna a ni,” tiin Kumar chuan Governor Phagu Chauhan a hmuh hnuah a sawi.
Kumar-a hian a kaihhruai Janata Dal (United)-a a MLA-te nen an inrawn hnuah bânna hi a thehlut a. He inrawnnaah hian Thawhlehni pawh khan RJD, Congress leh Left party mite pawh an bia a, BJP a kalsan a nih chuan a hova sorkar siam an duh hlawm tih an sawi.
Bihar assembly-a member 243 awmnaah BJP hian MLA 77 a nei a, JD (U) hian 45 a nei ve thung a. RJD kaihhruai eptuten MLA 112 an nei ve bawk a, rorelna fawng chelh turin MLA 10 dang thlawpna chiah an mamawh a ni.
JD (U) hian kum 2015 assembly inthlanah khan Grand Alliance tia hming invuah, RJD leh Congress nen an chuhho va; mahse, kum 2017 khan kalsanin BJP nen sorkar an siam a ni.
Congress hruaitu, Shakil Ahmed Khan chuan Thawhlehni chawhma lamah khan RJD-JD (U) sorkar siam a ni dawn tih a sawi a. Kumar chu chief minister a nih zui tur thu a sawi bawk.
An party-ah kum 32 mi, Tejashwi Yadav chuan an MLA-te an inlungrual a, Kumar-a chu sorkar thar siam turah an thlawp tur thu a sawi a. “BJP hian an thawhpui dang zawng zawng an phatsan a, mi dang an tihhmuh a ni,” a ti.
Sorkar thar siam dan tura thil hre thuk deuh thenkhat chuan kum 2015 inthlan hmaa an lo inrem lawk tawhna angin RJD hian ministry 15 an chang ang.
Tuna opposition leader ni mek, Tejashwi Prasad chu Kumar-a thachhangdawltu leh home minister a ni ang a. RJD hian Bihari Choudhary chu assembly speaker atan an hual lawk niin sawi a ni.
Grand Alliance-a tel ve dang, Communist Party of India (Marxist–Leninist) Liberation chuan sorkar thar din tum hi an zawm dawn em engmah an la sawi lo va. An party rorelna sang chu Thawhlehni tlai dar 5:00 khan an thukhawm thung.
BJP hruaitu hlunte chu an telna sorkar a tluk tak avangin Patna an pan khawm hlawm a. Heng zingah hian Sushil Kumar Modi leh union minister hlui, Ravi Shankar Prasad pawh a tel.
Kumar-a hian Amit Shah chu Maharashtra anga Bihar chhuaha BJP thawhpui dangte kut ruaka awmtir tumah a puh a. Uddhav Thackeray-a kha an party hruaitu hlun, Eknath Shinde-a’n Shiv Sena laka a helna a chawh chhuah avangin chief minister atangin a ban phah a. Shinde-a kaihhruai MLA helte chu BJP tanghovin an sorkar zui ta ni.