Serie A club Juventus chuan Eintracht Frankfurt winger Filip Kostic chu a nghetin an lalut a. Season liamta a Europa League a che tha tak Serbia international hian kum li a lo khelh tawhna club a chhuahsan.
Kum 29 mi hian season liamta khan Frankfurt hi Europa League a chawipui a, an champion-na kawngah goal thum a khung bakah midang goal khung tur vawi li a siamsak.
Premier League club West Ham United chuan lakluh tumin an ngaihven ngawrh hman hle a, mahse Italy lam pan a thlang ta zawk.
Juve hian a manah Euro maktaduai 16 an seng dawn a. Turin-ah hian kum thum contract ziakin kum khatah Euro maktaduai 2.5 vel a hlawh ang.
Massimiliano Allegri team hian vei lama khel tur duhthlan tur neih belh an duh a, Kostic hian medical a neih fel hnuah team hi a zawm tawh.
Serbia tana vawi 48 inkhel tawh Kostic hi winger pangngai bakah left midfielder leh wing-back anga chhawr theih a ni.
Frankfurt a kum li a cham chhungin an tan vawi 172 a khel hman a, goal 33 khungin midang khung tur vawi 64 a siamsak hman bawk.