Ralthuam nena inthuam pa pakhat, Beirut khawpuia bank-a a pawisa dah la chhuak thei lo thinrim, darkar ruk chuang a chhunga mi hrengtu chu mipuiten ‘hero’ lawmin an lawm hlauh.
Lebanon ram hian sum leh paiah dinhmun chhe tak an tawn mek avangin an bank-te hian mi pakhatin sum a khawih chet theih zat hi khauh takin an thunun.
Mi hrengtu nia an puh hi rifle nen bank-ah a lut a, petrol leih buain damdawi in awm man a pek theih nan pawisa lak chhuah ngei a phut niin AFP chuan a tar lang.
A chet dan hi rapthlak deuh mah se vantlangin an lawm hle thung a, a kawta pungkhawmte chu, “Hero i ni,” tiin an au rual a ni.
A chetnaah hian tumah hliam tuar pawh awm lovin inbiak rem a ni a, a hnenah hian ama pawisa dah tho atangin $35,000 pek a ni dawn tih LBC TV channel chuan a tar lang.
Police-in a mi hrente hi hruai chhuakin amah pawh khawpui thlang lam, Hamra Street-a Federal Bank branch atang hian an hruai chhuak a, thubuai an siamsak dawn em tih erawh sawi a ni lo.
LBC-in a tar lan dan chuan hetianga titu hian bank-a an pawisa dah chu an chhungkaw zinga mi damlo damdawi ina awm enkawl nan lak chhuah an mamawh a ni.
A unaupa chuan, “Ka unaupa hian bank-ah $210,000 a nei a, damdawi in awm man pek nan $5,500 chauh lak chhuah a duh a ni,” tiin thuthar lakhawmtute hnenah a sawi.
Bank chhunga a awm laia pawna lo awm, a nupui leh a unaupa chuan pawisa la chhuak tura dikna chanvo an neih angin, an mamawhna avangin tute pawh hetianga an chet duh vek tur thu an sawi.
Lebanon-a bank employees’ union hotute zinga mi, George al-Hajj chuan, “Hetiang hi a thleng fo,” tiin AFP a hrilh a. January thla pawh khan customer thinrim pakhatin Bekaa phaikuamah mi a hreng tawh tih a sawi a, a pawisate US dollar-a lak chhuah a tum a theih loh vang a ni.
“Sum dahtute hian an pawisa an duh a, an duh anga an hmuh theih si loh hian bank-a thawkte lakah hian an thinrim an hrithla leh si thin a ni,” a ti.