MNF party Adviser, Aizawl Mayor Lalrinenga Sailo chuan nimin khan Mizo Hnam Rûnah thu sawiin, Aizawl tui tlan lakna, Tlawng luia bawlhhlawh paih a nih loh nan a kam kawngpui hrulah len zar a ni vek dawn tih a sawi.
Lalrinenga Sailo chuan AMC hmalakna hrang hrang sawiin Tlawng kam kawngpui hrula len zar vek tura an hmalaknaah hian hmun thui takah hnathawh tawh a nih thu a sawi a ni.
Bawlhhlawh chungchang sawi zawmin AMC chuan Aizawl khawpui a lo thianghlim theih nan bawlhhlawh paihna hmun turte a siam a, bawlhhlawh tawih theite chu leithaah sawngbawl thin a ni tih sawiin, “Kan bawlhhlawh paihte hi mi thenkhatin inhlawh nante an lo hmang a, ei leh bar hmuh nante an lo hmang leh thin,” a ti.
Aizawl khawpui a lo changkan zel theih nan chuan mipuiten an zir a ngai tih sawiin, bawlhhlawh paih danah leh chhehvel enkawl danah mipuiten mawhphurhna lian tak an nei tih a sawi.
Mayor chuan tute emaw political party-in politics-a hamthatna lak tumin, mipui rilru hruai kawi tumin dawt hmangin AMC an bei thin tih a sawi a, social media hmanga thu dik lo thehdarh kawngah hian mipuite pawh an thang harh tulh tulh tawh a, thu dik leh dik lo an thliar thiam tawh hle tih a sawi bawk.