- Lallunghnema, Charity Lodge
Chhiartute chibai vek ule,
Thahnem ngai taka ka article in lo chhiar thin avangin ka lawm hle a ni. Lawmthu pawh ka hrilh nghal a che u. Taima takin lo chhiar zel ula, kei pawhin thahnemngai takin ka rawn ziak zel ang. He Huanga telh turte pawh rawlruk theih reng ka ni.Most welcome,kan ti a nih chu!
Tunlai hian consumer right hriatna kawngah khawvel ram hrang hrangte an in tlansiak nasa hle a. USA leh Russia ramahte leh UK, China ram chenin mipuiin consumer interest an ngaihven hle a.Khawvel pum huap pawl Lian tak Consumer International pawh kan nei nghe nghe a ni.Consumer movement an kalpui dan leh Consumer Court hrang hrang thubuai rem dan ngaihnawm tak tak hriat tur a awm thin bawk. India ramah pawh hian nasa takin consumer movement a kal chho mek bawk a.State danga consumer case chi hrang leh judgementte chu hmuh tur a awm deuh reng a ni.Tun tumah hian Mizoram State chhung ngeia case chin fel thu leh Department pakhat hrem chungchang ka rawn tarlang thuak thuak dawn a ni.
Ka tel ve na Consumer Advocacy Group-ah pawh member nasa takin an pung a. Consumer Group chhenfakawm tak a nih chho zel a beiseiawm hle. Kei pawh hi he Group, Mizoram State tan hian Coordinator ka ni ve mek bawk a. Hma pawh lak chhoh tan mek a ni a.Mipui thawvenna thlen ngei kan tum a ni.
Consumer tupawhin thurawn min pe thei a, tupawhin complaint an theh lut thei a ni.
Mihring chi hrang hrang kan awm hi thil tha tak a ni. Keinin consumer issue kan tuipui viau laiin mi dangin political party an buaipui a. Heng party politics buaipui tute hi chuan an pawl an atchilh but ringawt mai a. An sawrkar theih dawn phawt chuan dawt sawi a, mipui bum chu an hnapui ber a ni a. Keini ve thung erawh hi chuan a takin hma kan la a mipui bum ai chuan mipui tanpui hi kan duh ber, kan tuina ber a ni, kan ti thin. Ka han sawi leh ngawt a nih hi! Keini chuan consumer thil kan buaipui zel dawn a. MRP aia sanga thil hralh leh lei te hi kan hua a, thil man ziahna tih chhiat a, a dang phuah chawp hi kan ngai thei lo hle bawk. Thil man sang thut thut leh hniam thut thut hi a tha kan ti ngai lova, sumdawng zingah mahni duh dan dana thil thil man ‘chhiar’ ve ringawt te hi huatthla la kan ti em em bawk a ni.
Tunlai chu, he consumer khawvela ka vah velnaah hian 2wheeler taxi pu fel deuh deuh ka tawng fo mai. "Ka kal dawn tho" ti a pawisa la duh miah lo. Pawisa nawi a remchan loh avanga Rs. 10/- chauh min chawitirtute ka hmu fo bawk. Heng taxi pu mi fel ho hi khawiah pawh kal se, hmuh an nuam hle zel mai. Mi dangte tana malsawmna an ni ma thlawn lova, keima tan tak pawh malsawmna an ni ngei chhap e.
Hetih mek lai hian mipui hmakhua ngai miah lo taxi Pu ka tawng tho bawk. Ka hnialpui leh hau hrep an awm nual ta mai. Nimin piah lawk erawh kha chuan 2 wheeler taxi pu pakhat chuan kan to ti ho hrep hnuin in-selfie pui atan min sawm ve khauh mai!, "Ngatinge ka ti a", i hnathawh hi ropui ka ti em alawm, a ti ve mai bawk a. Eng ka nih loh teh reng nen .Tunlai intichangkang ho kan ang dawn, mahse,a tha tho, ka lawm hle e.
Thupui nei kan ni e, kan thupuiah kan lut tawh ang. Tun tum hian Mizoram State Consumer Disputes Redressal Commission judgement pakhat kan en ho dawn a ni.
Heti hi a ni a, Aizawl nu pakhat a hming Saithanmawii Zote, Dawrpui Vengthar Aizawl a mi chuan Online-in Aizawl District Consumer Forum(khang hunlai khanCommission tih a la ni lo-llh) ah complaint(CC No. 18 of 2018) a thehlut a; Postal Service (Department) a khing a ni.
Hei hi thil thlen dan chu a ni. Complaint hian ni 23 February 2017 -ah Anva Road Head Chennai, Post Office, Tamil Nadu atangin a pheikhawk, kekawr tlawn leh mawza etc parcel 20kg. a rit Rs. 57000/- man hu chu a thawn a. Aizawl post office chu ni 7 March-ah a lo thleng a. Parcel chu a lo tetin(torn) a tira kg. 20 a rit chu kg. 7 chauh a lo nia, thawmhnaw pawh engemaw zar a bo thlau ngei ang tih chu a rin theih nghal a ni. Hetianga a bungraw parcel tihchingpen a nih chungchangah hian a lungawi loh thi Pi Saithanmawii hian Dak In hoti te chu hrilhin complaint a thehlut ta a. Mahse a beisei loh takin Dak Puho chuan an lo bengkhawm tha duh lovin an lo chukha duh vak lo va. Post Office Act 1898 Sec. 6 hnuaiah an mawhphurhna a ni lo ve tiin an insawi fihlim a.
Mahse he nu huaisen hian Aizawl District Consumer Forum-ah chuan he Services hi a khing ta a. He forum hian Dak In(Postal Service) chu thiamloh chantirin compensation Rs. 57000/- article loss man leh compensation Rs. 30000/- mental agony complainant pe turin thubuai chu a remsak ta a ni. Heng compensation te hi complainant hnenah Dak In thuneitute hian an hlan tur a ni.
Postal Service hi he Forum thuremnaah hian an lungawi lo va, State Commission hnenah District Forum judgment chu an khing ve leh a. Mahse ni 24 June 2022 khan State Commission chuan District Forum judgment chu pawmpuia nemnghetin Postal Services hi thiamloh a chantir zui ve ta thova. Mental agony charge erawh chu a tihhniamsak ta thung a ni.
He State Commission Judgement ni 24 June 2023 a tihchhuah hi heng ho hian an hming an ziah hnan a ni.
1) P. K Phukan –
2) Dr. Lalthansangi – Honble Member
3) M. C Siamkunga – Honble Member
4) Lalhmingmawia – Honble Member
Hetianga Consumer Commission thubuai remna ka han tihchhuah fo chhan hi mipui hi i harh chhuak ang u, ka tih vang a ni. A remchan ang angin hetiang thil hi rawn tarlan zel ka tum. Tute emaw, Department emaw tihmualpho tumna a nii lova,mipui lo hriat leh entawn atan ka ziak a ni. Thahnem ngaihna luangliam a ni tih i inhriatsak zawk ang u, tiin kan thu leh hla hi ka han titawp teh ang. Chawlhkar lehah kan titiho leh dawn nia.