Mizoram Pradesh Congress Committee (MPCC) chuan tun laia Mizoram hmun hrang hranga kawngpui chhiat chhan chu MNF sorkar inthlahdah vangah an puh.
An thuchhuahah MPCC chuan tun lai hian Mizoram hmun hrang hrangah kawngpui chhe lutuk avangin mipuiin harsatna an tawk nasa hle a, hmun thenkhatah chuan mipuiin kawngpui an dang hial niin an sawi a. “‘MNF sorkar hnuaiah kawngpui a tha thin,’ tih uang taka sawi thintu MNF party-in thuneihna chan laia hetiang thil a thleng hi an chapo vang leh sorkar inthlahdah hrim hrim vang niin Congress party chuan a ngai a ni,” an ti.
Congress kaihhruai sorkar liam taah kawngpui a chhiat nasat chhan chu an sorkar tawp lamah namen loa ruahtui a tam vang nia sawiin, “Kawng siamna hnathawhna hun (working day) a tlem a, duh angin sorkarin kawngpui a siam thei lo,” an ti a; Science & Technology Department chhinchhiah danin an sorkar tawp lam kum thum chhung khan a zawn zatin ruahtui mm 2,000 mm chuang a tla a. Hemi kumah vek hian Sairang VC chuan kum 50 kalta chhunga Tlawng lui lianin a chim san ber kum a nih vangin a hriatrengna lungphun an siam hial niin an sawi.
Ruahtui a tam avangin kawngpui siamna tura Congress sorkar sum dah sa, Rs. nuai 8,595.19 pawh hmanna hun a awm mumal ta lo a, MNF sorkar thar lo piang khan a hmang ta char char nia sawiin, “MNF sorkar lo piang hian kawngpui siam tha turin vanneihna nasa tak an nei a. Congress sum dah sa an rochun bakah khua a tuihul tha em em a, ruahtui tlak nasat avanga Congress sorkarin harsatna a tawh ang kha MNF sorkar hian a tawk ve lo,” tiin, Assembly House-ah Mizoram kawngpui that avanga lawmthu sawina resolution an pass hial tawh avangin, kawng chhiate hi siam tha vat vat se la, heti chunga kawngpui an siam tha thei lo a nih chuan zahna chang hre turin an chah tih Congress party hian an sawi bawk.