Zoram People’s Movement (ZPM) chuan an policy, ‘Sustainable Development & Reform Policy’ an tih chu Thawhlehni khan an President Lalliansawta’n Vanapa Hall-ah an tlangzarh.
ZPM Working President K Sapdanga kaihhruai SDRP tlangzarh inkhawmah thu sawiin Lalliansawta chuan ZPM ruangam chu an policy-ah a lan thu sawiin, nakkum inthlanpuiah an tlin ngei theih nan an tih leh tih loh tur chu an rilru chuan a hre teuh tih a sawi.
“Sum sen tur kan nei lo a, kan duh hek lo; nihna emaw, hna emaw insawihmuh kan tum hek lo. Amaherawhchu, ZPM au hla pawimawh tak chu mi tinte hi mahni leh mahni intanpui thei tura siam a ni. A mawm a awm lo a, thlan tui a awm a. A huphurhawm a, a rit zawnga lak chuan party danga pem nawl nawlna tling a ni,” a ti.
ZPM Leader Lalduhoma pawhin thu sawiin, an policy kha a buah chuan a zawng zawng a tih theih loh a, a bu chhah zawk a la awm tih a sawi a. ‘Mizoram rorelnaah Pathian ram lo thleng rawh se’ tih chu ZPM lungphum, an policy innghahna a nih thu a sawi.
Lalduhoma hian Pathianin leilungah lalram din a duh a, chu mawhphurhna chu mihringte kutah a nghat tih sawiin, “Genesis atanga Thupuan kan en chuan, he leia kan hman tur deuh vek a ni. Nazareth Manifesto leh Lal |awngtaina kan khaikhawm chuan, Pathian duhzawng tih a ni mai; tunah, hetah kan ramah ngei pawh hian Pathian ram thlentir turin min zirtir a ni,” a ti.
Mizoram sorkar inrelbawlna leh sum enkawl dan chungchang sawiin, “Kan awm dan leh kan dinhmun enin hei hi Pathian mite tihdan tur a ni lo a ni. Pathian thu angin mihringten kawng tinrengah thil pahnih chiah thlan tur kan nei a, chu chu malsawmna leh anchhia a ni mai. Khawi kawng nge kan zawh tih hi chhut ngun a tul. Rorelna dik hi inthawina aiin Pathianin a duh zawk,” a ti bawk.
“Rorelna thleng phak harhna kan mamawh a, chutah chuan politician-te hi kan mawhphurhna a sang hle, kan nunte pawh i uluk ang u. Pathian duhdana ram rorelna kalpui hi ZPM-in kan tum ber a ni a, chu chu ZPM hian beiseina thar nen kan thlir a ni,” a ti a; Zoram hausakna leh Pathian malsawmna kan sawi zawng zawngte hi a miten ro an rel huna lo thleng tur a nih avangin, Pathian duhdana ram rorelna tungding tura inbuatsaih turin, siam thatna duhtute lama lo tel turin Zoram mipui a sawm tih a sawi.
Dr. KC Lalmalsawmzauva, General Secretary chuan an policy tlangzarh chu sawi fiahin, “Policy hi kan inziah thatsiak lo a, zirchianna behchhana duan a ni. Kan leiba chhawm chhoh tur ngaihtuahna avangin policy-a kan dah tam tak erawh kan phawrh ngam rih lo. Sem policy kan zuar lo a, SDRP hi mi taima leh thawkrim te tana duan a ni,” tiin, kuthnathawktute an dah pawimawh ber tur thu leh an pualin budget-ah pawh sum an dan tur thu a sawi bawk.